Eqqartuussivinni suliassat ikilisut
Nunatsinni eqqartuussiviit suliassaat 6.400-inik amerlassusillit januaarip aallaqqaataani 2014-imi uninngaannarput, taakkulu akornanniillutik pinerlussimanernut tunngatillugit suliassat 2000-it.
Ukioq mannalu suliassat 3.500-nut ikileriarsimapput, taakkunanilu pinerlussimanernut tunngatillugit suliassat 1.500-nut ikilisimallutik.
Aamma atuaruk Eqqartuussiviit ajalusuungajassaapput
- Ukiap ingerlanerani, immikkut tikisinneqarlutik suliassanik ikilisaajartortut peqatigalugit, pinerlussimanernut tunngatillugit suliat, katersuutiinnalersimasut, ikiliserujussuarpagut. Naalakkersuisut eqqartuussivimmilu sulisut, soorlu inatsisilerituut, nutserisut eqqartuussisullu peqatigalugit assut suleqatigilluarsimaqaagut, eqqartuussisoq Nunattalu Eqqartuussiviani pisortaq Birgit Skriver, KNR-imut oqarpoq.
Nunatsinni eqqartuussiviit suliassaat 6.400-inik amerlassusillit suliarineqapallannissaannik, danskit inatsisilerituut misilittagaqarluartut Kalaallit Nunaanni eqqartuussivinni unnerluussisutut eqqartuussisutullu ukiut marlunni suligallartussatut tikisinneqarput, ukiullu affaa ingerlariiginnartoq, utaqqisarnerit sivikinnerulerput.
Aamma atuaruk Eqqartuussivinni suliassat utaqqiinnartut Folketingimi oqaluuserineqarput
Tamannalu piviusunngortinniarlugu Nunatta Eqqartuussivia inatsiseqarnermut ministereqarfimmit 2013-imi aningaasanik 20 millionit koruuninik immikkut taperneqarpoq.
- Inatsisitigut isumannaatsuunissaq Kalaallit Nunaannilu eqqartuussisarnermi piffissaq sivikinnerusoq sullissisarnernut siullerpaamik aatsaat siunissami isumalluarnartuusoq tamassuma takutikkaa isumaqarpunga, Birgit Skriver oqarpoq, nangillunilu.
- Eqqartuussivinni suliassat ukiut marluk siorna 8.000-iusut maannamut ikileriarujussuarput, kisitsisitigummi takusinnaavarput ukioq manna januaarip aallaqqaataani suliassat nalunaarsukkat 3.500-nut ikileriarsimasut. Suli amerlagaluaqaat, suliarilluarneqapallannissaalli siornamut sanilliullugu pitsaanerujussuuvoq.
