Eqqartuussissuserisumik atuineq Namminersorlutik Oqartussat akisunaarpaat

Naalakkersuisut siulittaasuata Naalakkersuisoqarfiani pisortap Svend Hardenbergip soraarsitsinerit atorfinitsitsinerillu oqallisaaqisut pillugit arlaannaannulluunniit attuumassuteqanngitsumik nalunaarusiortitsinera akileraartartunit akisunaarneqarpoq.
Allattoq Jonas Løvschall-Wedel, Simon Uldum
februaarip 05-at 2014 08:21

Nalunaarusiaq inatsiseqarnermut pisortap Andreas Salmonyp soraarsitaaneranik Julie Rademacherillu atorfinitsinneqarneranik nassuiaateqarfiusussaq Namminersorlutik Oqartussanut akisuupilussuusimavoq. Malling og Hansen Damm nalunaarusiaminnut atatillugu 245.000 kr-inik akiligassiipput. Aviisip AG-p paasissutissanik takunnissinnaatitaanikkut misissuinerani tamanna erserpoq.

Naak suliaritinnera akisuupilussuugaluartoq nalunaarusiaq kingorna minnerunngitsumik Svend Hardenbergimut ajornartorsiortitsilerpoq, taassumani nalunaarusiaq arlaannaannulluunniit attuumassuteqannginnerarlugu saqqummiuteqqaaraluarpaa, tamannali eqqortuunngitsoq Transperancy International Greenlandimit naqissuserneqarmat oqaatsini utertittariaqarsimavai.

Namminersorlutik Oqartussat nalunaarusiaq aamma avammut saqqummiuppaat, tamannalu ilaatigut Inatsisartut Ombudsmandiannit isornartorsiorneqarpoq malitsigisaanillu nalunaarusiaq Naalakkersuisut nittartagaannit peerneqarluni.

Kingornali suliap paatsiveerusimaarfiunera aamma eqqartuussissuserisunut Malling og Hansen Dammikkunnut akissarsiutaalluarsimasoq, AG-p paasissutissanik takunnissinnaatitaaneratigut ersersinneqarpoq.

Misissuinermut akiligassiissutip saniatigut, eqqartuusissuserisut kingorna nalunaarusiatut saqqummiunneqartumut atatillugu siunnersuinermut akiligassiissutit marluk, katillugit 49.400 koruuninik aningaasartaqartut nassiuppaat.

Aammattaaq AG-p paasissutissanik takunnissinnaatitaaneratigut ersersinneqarpoq eqqartuussissuserisutut suliffeqarfik inatsiseqarnermut pisortap Andreas Salmonyp soraarsitaaneranut atatillugu inatsisitigut siunnersuisooqqissimasoq, Namminersorlutik Oqartussanut 15.500 koruuninik naleqartumik.

KNR-ip Niels Hansen Damm maanna oqaloqatigisimalerpaa, taannalu ilisimatitsivoq, 15.000 koruunit taakkua sulianut arlalinnut tunngatillugu akiligassiissutaasut. Aningaasammi taakkua ilaat inatsisilerinermut pisortap soraarsitaaneranut tunngasuugaluarput, ataatsimiinissaagaluarli tassunga tunngasoq pinngisaannarsimavoq.

Aamma atuaruk