Eqqartuussissuserisoq: Inatsit allanngortilli
Christian Harlang inuit pisinnaatitaaffii pillugit eqqartuussivimmi tunngaviiliisumik suliarinnittoqartillugu sullissisarsimavoq aammalu Kalaallit Nunaanni pissutsinik misilittagaqarluni.
Kalaallit qallunaatut oqalussinnaasut eqqartuunneqarneranni unnerluussutaasut qallunaatuumit kalaallisuumut nutserneqartannginnissaannik Højesteretip aalajangigaa, KNR-ikkut sapaatip-akunnerini arlalinngortuni sammivarput. Aamma sammillutigu, unnerluunneqartoq qallunaatut paasisinnaanngippat taanna nutserisumit toqqaannartumik nutserunneqartarnissaa Højesteretip naammattutut isigalugu aalajangersimagaa.
Taamatut inatsisitugut aalajangiineq eqqartuussissuserisumit, Christian Harlangimit assuarineqarluni isornartorsiorneqarpoq.
- Taamatut aalajangiineq ullutsinnut naleqqutinngilaq aammalu nalornilersitsisinnaalluni. Suliakkersuutaavallaartussaannginneq eqqarsaatigalugu aaqqiinertut tamanna isigineqarsinnaalluni. Kalaallinik eqqartuussinermi pingaaruteqarluinnartoq uani pineqarpoq, tassami eqqartuunneqarnermi unnerluussut kalaallimit unnerluunneqartumit paasineqartariaqarpoq, Christian Harlang oqarpoq.
Namminersorlutik Oqartussat inatsisaanni aalajangersakkani allassimasoq malillugu, tassalu unnerluutigineqartoq pisussaaffeqartoq unnerluussut nammineq oqaaserineqartutut unnerluutigineqartumut nassiunneqartartoq naammattoq, Inatsiseqarneq pillugu Naalakkersuisoq Anthon Frederiksen qanittukkut oqarpoq. Christian Harlang tamatumunnga isumaqataanngilaq:
- Eqqartuunneqartussanngornermi aggeqqusissutit tamatigut kalaallisut nassiunneqartassanerisa allassimanera aammalu inatsimmi qulakkeerneqarsimasoq, Namminersorlutik Oqartussat inatsisaanni aalajangersagakkatut oqaatigineqartoq nassaarisinnaanngilara. Tassani taamatut allassimasoqarsimappat suna tamarmi ajoquteqassanngikkaluarpoq. Isumaqarpunga eqqartuussisoqarnermi inatsit allanngortittariaqartoq, Christian Harlang oqarpoq.
Eqqartuussinermi maanna periusaavoq, unnerluutigineqartup kissaatigippagu nutserunneqarnissani unnerluussisumit nutserunneqartarluni. Tamanna naammanngitsoq, Christian Harlang isumaqarpoq:
- Eqqartuussilernermi aggersaanermi unnerluussutip danskisut kalaallisullu allassimanissaanik inatsimmi allassimasumik ersarissumik takussaasoqartinnagu, eqqartuussiveqarneq aamma eqqartuussineq isumannaatsumik ingerlanneqarsinnaanngilaq, Christian Harlang oqarpoq.
Tamatumunnga tunngatillugu Anthon Frederiksenip neriorsuutigaa danskit inatsiseqarnermut ministeriat attaviginiarlugu.
