Eqqartuussissulerisoq: Royalties inatsisitigut periarfissaapput isumassarsiarli pitsaasuunngilaq

- Taamatut akileraarusersueriaatsimik eqqussisoqarnissaanut inatsisitigut aporfissaqanngilaq. Royaltymik allatulluunniit taasinnaavat. Kisianni tassa periarfissaavoq, Peter Schriver, eqqartuussissulerisoq nuantsinnilu eqqartuussissulerisutut suliffeqarfiit annersaanni Nuna Advokatini piginneqataasoq oqarpoq.

Suliffeqarfiup ingerlatseqatigiiffiit uuliasiornerup, gassisiornerup aatsitassarsiornerullu iluani suliaqartut nunanit tamalaaneersut arlallit siunnersugarai.

Aatsitassanut pisortarfiup nalunaarutigigaluarpaa isumaqatigiissutit pittuisut 80-init amerlanerusut ingerlatseqatigiiffinnut misissuinissamut akuersissutitigut isumaqatigiissutaareersut unioqqutinnagit aatsitassat manngertut royaltymik akitsuusersorneqarsinnaanngitsut.

Aatsitassanut pisortaqarfik naapertorlugu ingerlatseqatigiiffiit piiaaneranni ukiuni siullerni 30-ni ingerlatseqatigiiffinnut akileraarutaasoq taamaallaat allanngortinneqarsinnaavoq. Royaltymik akitsuusiinissaq taamaalilluni periarfissaanngitsoq oqartussaasunit oqaatigineqarpoq.

Isumaqatigiissutillu taamatut paasineqartariaqarnerat naalakkersuisooqatigiit qineqqusaarnermi matumani saqqummiuppaat, Siumulli ima oqaaseqarluni:

- Ingerlatseqatigiiffinnut killiliussatut isumaqatigiissutaasuni allassimavoq ingerlatseqatigiiffiit akileraartarnermut akitsuusiisarnermullu pissutsit qaqugukkulluunniit atuiuttut malittussaagaat. Aamma maaniinnerminni allanngortinneqassagaluarpara, Siumup siulittaasuata KNR-imi Apeqqarissaarfigineqarluni marsip sisamaani oqarpoq.

Peter Schriverilu naapertorlugu aamma eqqortumik oqaluppoq..

- Qanorpiaq aaqqissuussisoqarsimanersoq soorunami misissorneqartariaqassaaq, aatsitassarsiutileqatigiiffiimmi isumaqalissanngillat unioqqutitsisoqartoq ataasiakkaat royaltymik akiliisussanngortinneqassappata. Ingerlatseqatigiiffiit ataasiakkaat royaltymik akiliisussanngortinneqarsinnaanngillat. Uangali isumaga malillugu inatsisiliornikkut arlaatigut nalinginnaasumik akileraarusiisoqarsinnaavoq, soorlu ass. suliaqarfinnik ataasiakkaanik, tassunga ilanngullugu aatsitassarsiorfik, Peter Schriverip ilanngullugu oqaatigaa.

Eqqartuussissulerisulli naqissuserpaa ingerlatseqatigiiffiit misissuinissamut akuersissummik tunineqareersimasut royaltynik akiliisussanngortinneqarnissaat isumassarsiatsilaanngitsoq isumaqarluni.

- Isumassarsiaq ajorluinnartutut isumaqarfigaara, suliffeqarfinnummi aningaasaqarnikkut piumasaqaatitigut atugassarititaasunik allannguinikkut aatsitassarsiornerup iluani annertuumik nalorninermik pilersitsissammat. Taamatut aalajangerneq uanga isumaga malillugu misissuilluni suliniutinut maanna ingerlasunut ajorluinnartumik kinguneqaratarsinnaavoq. Suliniutimmi aallartisarneqareersut maannamit annikinnerulersinneqarsinnaanerat ilimanarsinnaammat, eqqartuussissuserisoq Peter Schriver oqarpoq.