Eqqartuussinerit naapertuilluartuunngissinnaaneri ernumagineqartut

Akerlia uppernarsarneqartinnagu kinaaluunniit pinngitsuussaaq. Nunattali eqqartuussisoqarfiani taamaannerpa. Inuit pisinnaatitaaffii pillugit ilisimatusarfimmeersut taama aperipput, eqqartuussinerimmi tamarmik ilumut naapertuilluartumik suliarineqartarnersut pisinnaatitaaffilerisut nalornisigaa.

Allattoq Malik Brøns

novembarip 23-at 2016 15:53

Unnerluutigineqartut ilaannaat ilinniarsimasumik illersortissaqarput. Taamaammat illersortimit inatsisilerinermik ilinniarsimanngitsumik illersorneqartarput. Inersimasoq kinaluunniit pineqaatissinneqarsimanngitsoq illersortinngorsinnaavoq.

Illersortili naammattumik piukkunnarsarsimanngippat, eqqartuussineq naapertuilluartuunngitsoorsinnaavoq. Unnerluussisussaatitaasuneersut illersortinut sanilliullutik pikkorinneruallaarnerat tamatumani ajornartorsiutaavoq.

Inuit pisinnaatitaaffii pillugit ilisimatusarfiup tamanna ernumanartoqartippaa, inatsiseqarnermullu ministereqarfik illersuisuunermik piaarnerpaamik toqqaaqqullugu kaammattorpaat, taassuma illersortit ilinniartinniassammagit ilinniaqqinnissaallu isumagalugu.

Illersuisuunertulli atorfik inuttassarsiorneqalereerpoq.

Aamma atuaruk Illersuisut nukittorsaavigineqalersut

Inuit pisinnaatitaaffii pillugit ilisimatusarfiup eqqartuussivimmi oqaatsit atorneqartartut aamma ernumanartoqartippai.

- Pillarneqaataasussaasumik unnerluunneqaraanni taava naapertuilluartumik ilumut eqqartuussisoqartarpa. Naapertuilluarnerlu aamma sunik pisoqarneranik paasinnissinnaanermik ilaqarpoq. Tassalu oqaatsinut tunngasut tamarmik illersortillu ikorfartuinerata pitsaassusia ilumut naammannersut nalornisigaarput, inuit pisinnaatitaaffii pillugit ilisimatusarfimmi pisortaq, Jonas Christoffersen, taama oqarpoq.

Inatsisilerinermi oqaatsit atorneqartut assigiissaarneqarnissaat siunertaralugu Naalakkersuisut Oqaasiliortunut saafiginnissimasut pisinnatitaaffilerisut nuannaarutigisaminnik ilisimatinneqarsimapput. Suliamilli nukingisaaripput.

Taava aamma inatsisilerinermi allagaatit uppernarsaatillu allaaserineqarneri kalaallisut paasisassaalernissaat sulissutigineqassasoq aamma kaammattuipput.