Eqqartuussiviup Tillie Martinussenimut inerteqquteqartitsiniarneq itigartitsissutigigaa
Nunatsinni Eqqartuussiviit Michael Rosingip Suleqatigiissitsisunit Tillie Martinussenimut partiillu maanna aningaaserisuanut, Jesper Enevoldsenimut inerteqquteqartoqarnissaanik kissaateqarnera itigartitsissutigaa.
Michael Rosingip Tillie Martinussen Suleqatigiissitsisut aningaasaataannik namminerminut atornerluisimasutut pasivaa.
Michael Rosingillu maanna siulittaasuugallartup aningaaserisullu partiip aqqa atorlugu taarsigassarsisinnaaniarsinnaanissaat inerteqqutigineqassasoq kissaatigigaluarpaa.
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Nunattali eqqartuussiviata tamanna itigartitsissutigaa, Michael Rosingillu suliami aningaasartuutit 5.000 koruuniusut maanna akilertussanngorpai.
Michael Rosingip eqqartuussivimmit inerteqquteqartitsiniarnini sermitsiaq.ag-mut ima tunngavilerpaa:
- Tillie aningaasanik atuinissamut inatsisitigut tunngavissaqanngilaq, annilaanngatigaaralu partii akiitsoqartilersimassagaa.
Taassumami partiip akiliisinnaanani akiligassaqalersinnaanissaa ernumassutigalugu, Sermitsiaq.ag-mut nassuiaatigaa.
100.000 koruuninut aningaasartuutit
Tillie Martinussenip Suleqatigiissitsisullu siulersuisuunerisa partiip aningaasaataanik atornerluisoqarneraasoqarneri tamarmik eqqortuunnginnerarpaat.
Partiimit partiimut aningaasatigut tapiissutinik atuisoqarnera pillugu suliaq Suleqatigiissitsisut iluanni isumaqatigiissutaavoq.
Matumanilu partiip siulittaasorigallagaata, Tillie Martinussenip siulersuisuunerillu partiimi ilaasortanit allanit siulersuisuunerit partiimut tapiissutinik Tillie Martinussenip namminermut aningaasartuutissaanik atornerluisoqarsimaneraasoqarnera eqqunngitsuunerarpaat.
AAMMA ATUARUK Immikkut ilisimasalik Suleqatigiisitsisut aningaasanik atuinerannut: Malittarisassaqanngilaq
Aningaasartuutini sapigaqarluni anillattoornermi suliaritinneq 3.654 koruunit, partiip ilaasortat uippakajaarnermi ikiorserneqarnerannut 50.000 koruunit, oqarasuaammut angallattakkamut 2020-mi immiinermut 25.500 koruunit Tillie Martinussenillu inissiamut nutaamut nutserneranut inikuanillu eqqiaanermut 14.000 koruunit ilaatigut pineqarput.
Aningaasartuutit taakku tamarmik partiip akilerpai, aningaasartuutillu katillugit 100.000 koruuniullutik.
Kina siulittaasuua?
Partip aningaasaataanik qanoq atuisoqarnera pillugu isumaqatigiinngittoqarnera partiimi mikisumi kina siulittaasuunersoq ammasumik isumaqatigiinngissutaalerpoq.
Michael Rosingimi partiimi siulittaasuusimasoq siulittaasunngoqqinniarluni nalunaaruteqarpoq. Taassumalu oqarnera naapertorlugu atuuffimmit pisortatigoortumik tunuarnikuunngilaq.
AAMMA ATUARUK Suleqatigiissitsisuni siulittaasoq suli paatsuungassutigineqartoq
Partiip malittarisassai naapertorlugit siuliuttaasoq tunuassaguni partii immikkut ittumik ataatsimeersuartariaqarpoq, partiilli siulersuisuisa Tillie Martinussen maanna siulittaasuugallartoq taperserpaat.