Eqqakkat pillugit taallioqataagit 5.000-inillu pinnallutit
Erinarsuut Julie Berthelsenimit erinarsorneqartoq Nunatta paarilluarnissaanut aamma pinngortitap illoqarfiillu eqqiluitsuutinnissaannut tunngassuteqarpoq.
Paasititsiniaaneq Qujanaq 2016-imi maanna aamma ingerlanneqartussanngorpoq. Atuartut kajumissaarneqarput erinarsuummut Qujanamut versimik ataatsimik arlalinnilluunniit taallioqqullugit.
Taamaammat oqaatsinik pinnguarneq nuannarigussiuk pinngortitap paarilluarnissaa pillugu taalliorlusi aallarteriannguaritsi. Unammisitsineq novembarip 16-iani naammassineqassasoq, Qujanameersut ilisimatitsissutigaat.
Ajugaasoq Julie Berthelsenimit aamma avatangiisinut naalakkersuisuimit Mala Høy Kukómit novembarip qiteqqunnerani toqqarneqassaaq.
- Qujanaq eqqaavimmut igitsisartunut aamma pinngortitamiikkaangassi eqqagassassinnik angerlaassisartunut tamanut tunngasuuvoq. Kalaallit Nunaata paarinissaa ataatsimoorluta akisussaaffigaarput, Mala Høy Kúko ukioq manna arlalinnik pinnattaassaqartitsilluni, ilaatigut ajugaasumut 5.000 koruuninik unammasitsineq aallarnerlugu taama oqarpoq.
Julie Berthelsen Ilulissani Nuummilu februaarimi tusarnaartitsissaaq.
Juliep erinarsuut Qujanaq nutaanik versitalik atuleruniuk Ilulissani Nuummilu meeqqat erinarsoqatigissavai, aamma Qujanamut nipilersortunik videoliamik nutaamik immiussisoqassaaq.
