Politikki

Eqqagassalerineq ataatsimeersuarnermi sammineqartoq

Nunaqarfiit ataatsimeersuassutigineqarmata eqqagassalerineq sammineqaqaaq Kalaallit Nunaanni nunaqarfiit peqaatigiiffianni KANUNUPE-mi siulittaasoq, Jens Kristian Therkelsen, ammaanersiornermi oqaaseqarpoq. Tassanilu nunaqarfinni inoqarfinnilu minnerusuni ajornartorsiutaasut aaqqinneqarsinnaasullu politikerinut borgmesterinut naalakkersuisullu siulittaasuannut saqqummiuppai.

Allattoq Thomas Munk Veirum, Sara K. Jakobsen

maajip 30-at 2017 14:04

Soorlu ilaatigut aqquserngiorneritt pitsaanerusut najugaqarfissanillu sanaartornerunissaq ujartorneqarput, taavalu aamma meeqqat atuarfii napparsimmaveqarnerillu ataatsimut isigalugu ajornartorsiorput.

Eqqagassalerineq ataatsimeersuarnermi oqaluuserineqaqaaq. Ammasumik ikuallaasarneq 2007-mili inerteqqutaalernikuusoq oqaatigineqarpoq, nunaqarfimmili ammasumik ikuallaasarneq suli atuuppoq eqqagassallu qimaannarneqartut amerligaluttuinnartut, nunaqarfinni aqutsisut oqaatigaat.

Nunaqarfinni Ikuallaaviit aserfallassimanerat atorneqarsinnaajunnaarsimanerallu ilaatigut pissutaavoq.

Naalakkersuisut siulittaasuata Kim Kielsenip ilaatigut kaammattuutigaa nunaqarfinni ikuallaasoqartassanngitsoq aammalu eqqagassat ikuallaavinnut assartorneqartarnissaat kaammattuutigalugu.

Kommuneqarfik Sermersuumi borgmesteri Asii Chemnitz Narup eqqagassalerinermut tunngatillugu aamma ilaatigut oqaatigaa Kapisilinni eqqagassat poortorneqariarlutik Nuummut ikuallaavimmut assartorneqartalernikuusut.

Taamaattumillu nunaqarfiit allat periarfissaq taanna aamma atorsinnaagaat oqaatigalugu.

AAMMA ATUARUK Naalakkersuisut eqqagassalerinermi ikiuunniartut

AAMMA ATUARUK Naalakkersuisut kommunip susassaqarfia iliuuseqarfigileraat

Eqqagassalerineq ataatsimeersuarnermi sammineqartoq

Aamma atuaruk