Naalakkersuisut kommunip susassaqarfia iliuuseqarfigileraat
Qaanaami eqqagassalerineq Qaasuitsup Kommuniata akisussaaffigaa, Naalakkersuisulli avatangiisitigut pissutsit pitsanngorsaavigineqarnissaannut kommuni ikiorniarlugu aalajangersimapput. Taamaammat Naalakkersuisut Qaanaami avatangiisini immikkut ittumik suliniuteqarnissamut katillugit 750.000 koruunit aningaasaliissutigaat. Tamatumunngalu peqatigitillugu kommuni nammineerluni 250.000 koruuninik aningaasaliissuteqassaaq. Namminersorlutik Oqartussat tusagassiorfinnut nalunaaruteqarlutik taama allapput.
Qaasuitsup Kommunia Qaanaami eqqagassalerinermi annertuunik naammassiniagassaqarpoq.
Eqqakkanik ikuallaavik ukiuni arlalinni atorneqarsinnaasimanngilaq, eqqaavissuaq aqunneqanngilaq karsillu savimerngit, ukiukkut issitsillugu atorsinnaanngitsut, anartarfiit puuinut ilioraavittut atorneqartarput..
- Eqqagassalerineq pitsaasoq nammineerluni takkussinnaanngilaq, tamannalu pissappat aningaasat annertuumillu suliniuteqarnissaq pisariaqarput. Kisiannili avatangiisini pissutsit pitsaasuunissaat piumasaqaataavoq pisariaqarluinnarlunilu. Kommunip suliassaq kivissinnaanngippagu, kommuni Namminersorlutik Oqartussanut saaffiginninnissamut tikilluaqqusaavoq, taamaalillutalu suliaq ataatsimoorluta misissorsinnaassavarput, Pinngortitamut, Avatangiisinut Nukissiuuteqarnermullu Naalakkersuisoq, Mala Høy Kúko tusagassiorfinnut nalunaarummi taama oqarpoq.
Kommuni aningaasaleeqataassaaq
750.000 koruunit Naalakkersuisunit tapiissutigineqartut kommunip Qaanaami eqqagassalerinerup pitsaanerulersinneqarnissaanut atussavai. Naalakkersuisulli aningaasaliinerminni kommunip nammineerluni ikinnerpaamik 250.000 koruuninik avatangiisinik pitsanngorsaanissamut aningaasaliissuteqarnissaa piumasaraat.
Pinngortitamut, Avatangiisinut Nukissiuuteqarnermullu Naalakkersuisoq, Mala Høy Kúko, Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq, Martha Lund Olsen, aamma Peqqissutsimut Nunanilu Avannarlerni Suleqatigiinnermut Naalakkersuisoq, Doris Jakobsen peqatigalugit marlunngornermi innuttaasunik ataatsimiititsiniarpoq.
