Eqaluk Høegh ullut 100 sinnerlugit qaangiuttut: Suut suliarissanerlugit suli paaseqqissaanngilagut

Eqaluk Høegh meeqqanut, inuusuttunut ilaqutariinnullu naalakkersuisuunermi oqimaattorsiornikuuvoq.

Uippajakaarnermik nalaataqarpoq, maannali atuuffimmini sulileqqippoq.

Taanna nipaqanngippallaartoq Demokraatit taamani oqarput. Aamma naalakkersuisup tusagassiorfinnut allanut oqaaseqartarnera allanullu oqaaseqarumannginnera Tusagassiuinermi Sulisut Peqatigiiffiata immikkoortitsinerunertut nalilerpaa.

Eqaluk Høegh-imi KNR-mut nalunaarpoq, ullut 100-it siulliit oqaaseqarniarai saniatigulli tusagassiorfinnut allanut oqaaseqartarluni.

Piffissaq piareersarnermut atoqqaarusussimallugu maanna oqaluttuarpoq.

- KNR-minngaanniit apeqqutit siammasissut, taavalu immaqa ataatsimut isiginnittumik nipeqartut taakkua pisariaqartissimavakka piareersarluarlunga, suliallu aamma amerlaqimmata taakkua soorunami misissuataarluariarlugit apeqqutit taamatut nipillit akissuteqarfigisarnissaannut, Eqaluk Høegh KNR-mut oqarpoq.

AAMMA ATUARUK Anna Wangenheim: Eqaluk Høegh er for stille

KNR naalakkersuisumut apersuerusulluni juunip qaammataanit saaffiginneqattaarpoq. Eqaluk Høegh Naalakkersuisut siuliinut isornartorsiuingaatsiartartutut aamma ilisimaneqarpoq.

KNR-p ilaatigut apeqqutingerusunnikusai tassaapput naalakkersuisoq Inatsisartut ukiaru ataatsimiinnissaannut sunik siunnersuuteqarniarluni pilersaaruteqarnersoq, naalakkersuisuusartuniillu siornatigut isornartorsiortakkaminit qanoq allaanerusumik suliniarnersoq.

- Pingaartilluinnaqqissaarpara assiliaq tamakkiisoq avammut nalunaarutigineqassappat eqqummaariffigisassat allat uani pineqartut aamma ilaatinneqarnissaat, taamaattumik apeqqut inummit inummut nalilersorneqarsinnaavoq, kisianni uanga taamatut isumaqarpunga.

Taanna Inatsisartut ukiaru ataatsimiinnissaannut inatsisissatut siunnersuusiussanani oqarpoq.

AAMMA ATUARUK Meeqqanut naalakkersuisoq ullut 100-it qaangiuppata aatsaat apersorneqarumasoq

Naalakkersuisuni inuusunnerpaap suliat ingerlareersut nangeqqissavai. Taannalu naapertorlugu sulianik suliarinnittarneq ingammik kommunini arriippallaartoq.

KNR naalakkersuisoqarfik nutaaq pillugu apersorusullutit juunip 20-ata missaani saaffiginnippoq. Ulluni taakkunani tassa juunip 20-ani siumut suut takorloornikuuigit naalakkersuisoqarfimmi suliassatut?

- Meeqqat pisinnaatitaaffii uani eqqarsaatigissagutsigit pissutsit taava nalunngilagut, pingaartumik kommunini sulianik suliarinnittarneq kiisalu meeqqat suliassanngortitat assersuutigissagutsigit tassani imaannaanngitsorujussuarmik inissisimalluta. Suliat pitsaanerpaamik aamma soorunami siunissami ikiuisarnissatsinnut sinaakkusiorniarluta alloriarnissatsinnut soorunami takorluugaqareernikuuvugut.

KNR-p apeqqutigerusunnikuuaa, naalakkersuisoqarfik nutaaq qanorpiaq suliffigineqarniarnersoq. Tamakkua akinissaat angivallaarsimappat qaammami ataatsimi siullermi akinissaanut?

- Isumaqarpunga una siullertut oqaatigilaartariaqarlugu, ilisimasagut naalakkersuisoqarfitsinniit annikittuaraammata, naatsumik taamak oqaatigalugu. Ilisimasat amigarmata soorunami oqaatigiuminaappoq sunarpiaruna taava qanorpiarlu ingerlariaqqinnissarput sinaakkusersussavarput?

Tamanna allanngortikkumallugu naalakkersuisoqarfiup kommunit Namminersorlutik Oqartussallu ataqatigiimmik aaqqiissuussisinnaasumik sulianik suliarinnittarfimmik atugaqalernissaat sulissutigaa.

Tamannalu piareerpat anguniakkat nutaat aallartinnissaat piffissanngussasoq taanna oqarpoq.