Anna Wangenheim: Eqaluk Høegh nipeqanngilaq - nipeqanngilluinnarpoq
- Meeqqanut inuusuttunullu naalakkersuisoq nipeqanngilaq - nipeqanngilluinnarpoq. inatsisartunut ilaasortaq Demokraatineersoq Anna Wangenheim taama oqarpoq.
Eqaluk Høegh naalakkersuisuunngikkallarami isornartorsiuingaatsiarluni assigiinngitsutigut saqqummertarpoq. Naalaakkersuisunngormalli nutaaliorluni ersarissumillu saqqummernissaa taassuma isumalluarfigisimagaluarpaa.
- Assersuutigalugu meeqqat ulluanni oqalugiaammik arlaannilluunniit saqqummerluni meerartatsinnut ilaqutariinnullu oqariartuuteqarnissaa naatsorsuutigisimagaluarpara, tamannalu aamma pinngilaq, Anna Wangenheim oqarpoq.
AAMMA ATUARUK Meeqqanut naalakkersuisoq ullut 100-it qaangiuppata aatsaat apersorneqarumasoq
Meeqqanut, inuusuttunut, ilaqutariinnut inatsisillu atuutsinneqarnerannut naalakkersuisoq, Eqaluk Høegh naalakkersuisutut ivertinneqaramili KNR-ip nutaarsiassaqartitsivianiit apersoneqarusunngilaq.
Taanna ivertinneqarnerminiit ullut 100-t qaangiuppata aatsaat oqaaseqarusuppoq. Demokraatineersullu tamanna pakatsinartoqartippaa, taannami isumalluarsimagaluaqaaq:
- Sakkortuunik oqariartuuteqartarnikuugami. Soorlu assersuutigalugu naalakkersuinikkut politikikkullu aqutsineq pakatsilluinnaqqaffigalugu allannguutit pisariaqarluinnartut tigussaasut piaarnerpaamik iliuuseqarfigineqartariaqarmata.
- Taannalu massakkut nammineq naalakkersuisunngornermi kingorna suli tigussaasumik oqariartuuteqarneranik nutaaliortumillu tusaasaqannginnama pakatsinartorujussuuvoq.
Naalakkersuisoq immikkoortitsisussaanngilaq
Eqaluk Høegh KNR-ip nutaarsiassaqartitsivianut oqaaseqarusunngeriarluni Sermitsiaq-AG-mit pingasoriarluni apersorneqarpoq, KNR-illu allaakaatitassiaanit Nunatta Nipaa-niit ataasiarluni apersorneqarluni. Tamaaliorneralu tusagassiuutinik immikkoortitsinerusoq, tusagassiortut peqatigiiffiata siulittaasuata nalilerpaa.
Tamanna Anna Wangenheimip ilalerpaa:
- Immikkoortitsisussaanngilaq. Naalakkersuisuugami inunnut tamanut, taamaalilluni aamma pisussaaffeqarpoq tusagassiuutit aqqutigalugit inuiaqatigiinnut torersumik saqqummiisarnissani, oqariartuuteqartarnissanilu, Demokraatit sinnerlugit inatsisartunut ilaasortaq, Anna Wangenheim KNR-imut oqarpoq.