EPI: Aasianni nipilersornermik ilinniarfiliortoqaannarli
Eqqumiitsuliornermik Ilinniarfiup Aasiannut nuunniarneqarneranut atatillugu Eqqumitsuliornermik Ilinniarfiup, Eqqumiitsuliortut Katttuffiata Kimik-up eqqumiitsuliornermilluunniit ingerlataqartut tusarniaavigineqaqqaarsimanginnerat, Eqqumiitsuliornikkut Pinngorartitsisut Ingerlatsisullu siulittaasuata Juaaka Lyberthip tupigusuutigaa:
- Eqqumiiginanngitsuunngilaq nuussiniarnermik naalakkersuisut siulittaasuata aalajangersimanera sioqqullugu Eqqumiitsuliornermut Ilinniarfik aamma nunatsinni eqqumiitsuliornermik suliaqartut allat tusarniaaffigineqarsimanngimmata, Juaaka Lyberth, tusagassiuutinut nalunaarummi allappoq.
AAMMA ATUARUK Stadig uenigheder hos Naalakkersuisut
Nunatsinni illoqarfinni tamani kulturikkut eqqumiitsuliornikkullu suliaqarnerup siuarsartuarnissaa EPI-p soqutigisarigaa Juaaka Lyberthip erseqqissaatigaa, Aasiannillu kulturilerinermut tunngasumik ilinniarfeqalersinnaanera Naalakkersuisunit eqqarsaatigineqarpat Nipilersornermut Ilinniarfimmik Aasianni pilersitsisoqarnissaa EPI-p siunnersuutigaa:
- Aasiaat nipilersortarfittut festivaleqarfiullaqqissutullu uummaarissutut ilisimaneqarluarnera atorluarlugu. Soormi alloriarneq pissusissamisoortoq alloriarfigineqarnianngila nipilersornermillu ilinniarfimmik pilersitsisoqarluni, Juaaka Lyberth, EPI sinnerlugu aperivoq.
Nipilersornermik Ilinniarfimmik Aasianni pilersitsineq Aasiannuinnaanngitsoq nunatsinnulli tamarmut iluaqutaassasoq, aningaasartuutillu ikinnerussagaluartut, Juaaka Lyberthip oqaatigaa.