Suliffinnik nussuiniarneq kulturikkut sullissivinni nalornilersitsisoq

Kulturikkut sullissiviit marluusut tusagassiorfinnut nalunaaruteqarlutik taama allapput.

- Eqqumiitsuliornermik Ilinniarfiup Aasiannut nuunneqarnissaanik politikkikkut aalajangiisoqarsimanera tupaallaatigisupilussuuarput, taamatut aalajangiineq tunngavilersorluagaarpasinngimmat aammalu Eqqumiitsuliornermik Ilinniarfiup pisortaa suleqatigineqaranilu tusarniarneqarsimanngimmat, Nunatta Isiginnaartitsisarfiani pisortaq, Susanne Andreasen, aamma Isiginnaartitsinermik Ilinniarfimmi aqutsisoq, Varste Mathæussen, tusagassiorfinnut nalunaaruteqarlutik taama allapput.

Eqqumiitsuliornermik Ilinniarfiup Nuummit Aasiannut nuunneqarnissaata Naalakkersuisunit aalajangiiffigineqareersimaneranik Naalakkersuisut siulittaasuata Kim Kielsenip oqaaseqarnera aqutsisut marluusut qisuariaateqarfigaat.

AAMMA ATUARUK Ilinniarfiup nuunniarneqarnera Kimimmit tupigusuutigineqartoq

Eqqumiitsuliortut kattuffiata Kimiup taamatut aalajangiisoqarsimanera akerleralugu nalunaaruteqarnera Nunatta Isiginnaartitsisarfiata Isiginnaartitsinermillu Ilinniarfiup taperserpaat.

- Aqutsisut pisortallu qulaatiinnarlugit taamatut aalajangiisoqarsimarpasinnera kulturikkut sullissivinni eqqumiitsuliornermillu ilinniarfinni tamani nalorninermik pilersitsivoq, taamaammat paaserusupparput uagut tullinnguunneqarnersugut, kulturikkut sullissivinni marluusuni aqutsisut tusagassiorfinnut nalunaarummi taama allapput.

AAMMA ATUARUK Nuussuinissamik pilersaarut Naalakkersuisuni paatsiveerusimaarutigeqigaat