Eqqumiitsuliortunut inatsit nutaaq, eqqumiitsuliortunit iluarineqarpoq

Kultureqarnermut Naalakkersuisup, Nivi Olsenip (D), eqqumiitsuliornermut ingerlatsineq pillugu inatsisissatut siunnersuuteqassamaarnera, Eqqumiitsuliornikkut Pinngorartitsisut Ingerlatsisullu peqatigiiffiata, EPI-p nuannaarutigaat.

EPI-mi siulersuisut siulittaasuata, Juaaka Lyberthip qilanaaraattaaq, eqqumiitsuliornermut aningaasaateqarfimmik pilersitsisoqarnissaa. Taamaalilluni eqqumiitsuliat pillugit tapiissutissanik qinnuteqaatinik suliaqarsinnaatitaasussamik pilersitsisoqarpat, tapiisarnerup pitsaanerulernissaanik tamanna aqqutissiuussissasoq, oqaatigalugu.

- Taamaalilluni eqqumiitsuliat pitsaassusaannik nalilersuisarneq atorfilinnit politikerinillu suliarineqartarunnaarluni immikkut ilisimasalinnit politikkimillu ingerlatsinermik attuumassuteqanngitsunit suliarineqartalernissaat qilanaaraarput, EPI-mi siulittaasoq, Juaaka Lyberth tusagssiuutinut nalunaarummini allapoq.

EPI siulersuisut aamma kaammattuutugaat, Kalaallit Nunaanni Eqqumiitsuliornermut Siunnersuisoqatigiivinik pilersitsisoqartariaqartoq, Nunani Avannarlerni nunat soorlu taamaattumik maanna ingerlataqareersut assigalugit.

Juaaka Lyberthip aamma piumasaraa, eqqumiitsuliortut suliaminnut piginneqaartuunerat taakkualu akilersorneqartarneri eqqarsaatigalugit nipilersugaappata, atuakkiaappata, filmiliaappata, eqqumiitsuliaappata isiginnaartitsineruppatalluunniit akilersuinissaq inatsisitigut malinnaatinneqartariaqartoq.

Nunatsinni internettsikkut periarfissat nutaat amerliartortillugit, digitaliseeriinikkut sukkaqisumik allangoriartortoqartoq, EPI-mit aamma ilisimaneqarpoq. Inatsisiliornermilu taakku aamma puigorneqassanngitsut, Juaaka Lyberthip eqqaamaqquaa.

Inatsisissatulli siunnersuutissat aaqqissuussaanikkut allaffissornikkullu aaqqiissutissatut, Naalakkersuisumit Nivi Olsenimit taamaallat siunnersuutigineqartut EPI-t nalilerneqarput.

- Tamanna immini ajunngikkaluarpoq. Kisiannili naammanngilaq. Tassami eqqumiitsulianik pilersirartitsisut erinniortuuppata, taaliortuuppata, atuakkiortuuppata, filmiliortuuppata allatulluunniit pilersitsiortuuppata taakku ulluinnarni atugaat annikitsuinnarmik inatsisissami siunnersuummi pineqarpoq, tassalu tamanna naammaginngisarput, EPI-p siulittaasua, Juaaka Lyberth tusagassiuutinut bnalunaarummini allappoq.

Inatsisissatut siunnersuut, Nunatsinni eqqumiitsuliornermik suliaqartunut tusarniaassutigineqarluni nassiunneqareerpoq.