Enhedslisten uppernarsaatinik piumasaqarpoq
Naalakkersuisut tapersersortaannit Enhedslistenimit piumasaqaatigineqarpoq, Danmarkimi Kalaallit Nunaannilu Naalakkersuisut nunat tamat isumaqatigiissutaannik, Danmarkip atsioqataaffigisimasaannik, unioqqutitsinnginnissaq qulakkeeqquaat.
- Suliariniakkanut annertuunut atatillugu inatsimmi ataasiinnaq ajornartorsiutaasoraarput. Tassalu § 10-mi imm. 2 – 7 naapertorlugit, Kalaallit Nunaanni kattuffiit isumaqatigiissusiorsinnaatitaanerannik sakattaattoqartillugulu iliuuseqarsinnaatitaanerannik pisariaqanngitsumik killiliisoqarnera. Nunat tamat isumaqatigiissutaannik tamanna unioqqutitsinerusinnaavoq, januaarimilu SIK kiisalu pisortani atorfillit kattuffiat oqaloqatigigaluarakkit paasisaqarnerunngilanga, Enhedslistenip Kalaallit Nunaat pillugu oqaaseqartartua, Finn Sørensen oqarpoq.
Juullinngitsorli Finn Sørensen Ove Karl Berthelsenimut allagaqarluni, suliariniakkat annertuut ingerlanneranni nunat tamat isumaqatigiissutaasa naapertorneqarnerat qulaakkeeqqusigalugarpoq, maannali qaammatit marluk qaangiunneranni suli Aatsitassanut Naalakkersuisumit Finn Sørensen akissuteqarfigineqanngilaq.
- Naalakkersuisut isumaqarunik nunat tamat isumaqatigiissutaat inatsimmi unioqqutinneqanngitsut, taava Ove Karl Berthelsenimit suli akineqannginnera paasisinnaanngilara. Akornutaasinnaasut ilagaat Kalaallit Nunaata Namminersulerluni inatsimmi § 16-imik unioqqutitsisinnaanera. Tassani suliariniakkanut piareersarnermi Namminersorlutik Oqartussat iliuuseriniagaata akuerineqannginnerani, naalagaaffiup nunanut allanut pisarialinnik aaqqissuiniarneranut, soorlu naalagaaffiup nunat tamat suleqatigiinnerinut peqataasinnaaneranut tunngasut Kalaallit Nunaata naalagaaffimmik isumaqatiginninniutigissaannut tunngasoq. Taamatut iliortoqarsimanngilaq. Neriuutigaarali kissaatigisatta malinneqarnissaata isumannaarneqarnissaa, taamaalippat immikkut ittumik inatsit tapersersorsinnaaniassagatsigu, Finn Sørensen knr.gl-imut naqissusiivoq.