Enhedslisten: Danskit naalakkersuisui kalaallinik savalimmiormiunillu ilaatitsinissamik soqutiginninngillat
Danskit naalakkersuisui ilaatigut illersornissaqarfimmi sulinermut Kangerlussuarmi ilinniarfissamut timmiasartuaqqanillu ungasianiit aquttakkanik pisinissamut atugassanik 1,5 milliardit koruuninik aningaasaleeqqamerput.
Illersornissaq pillugu Folketingimi isumaqatigiissuteqartuusut taama isumaqatigiissuteqartigatik matoqqasumik isumaqatigiinniarput, tamatumanilu nunatta nunanut allanut tunngasuni naalakkersuisua Savalimmiunilu taamatut naalakkersuisuuffeqartoq kisimik peqataapput.
Taamali isumaqatigiinniarsimaneq "kanngunartoq", Enhedslistenip Nunat Avannarliit, Issittoq, nunarput aamma Savalimmiut pillugit oqaseqartartua, Christian Juhl, isumaqarpoq.
AAMMA ATUARUK Air Greenland timmisartuaqqanik ungasianiit aquttakkanik tunniussaqarsinnaanngilaq – Issittumili suli nakkutilleeqataarusuppoq
Issittumik sakkussalersornissaq pineqartillugu naalakkersuisut Folketingimi ilaasortat Atlantikup avannaaneersut ilaserisimanngimmatigit kanngunarpoq.
Christian Juhl qallunaat aviisianni nittartakkami Altinget Arktisimi ilanngusqarluni taama allappoq.
Taaasuma nunatta Inatsisartui aamma tusarneqarsimannginneri eqqaasitsisssutigaa.
- Kalaallit Nunaannut Savalimmiunullu tunngasunik aalajangiigassaqartillugu, taakkua namminneq inatsisartuminni isummersimatinnagit aalajangiisannginnissarput, Folketingimi allassimanngitsumik ileqqorigaluarparput. Ileqqoq taanna naalakkersuisut Folketingimilu amerlanerussuteqartut soqutiginngilaat, Christian Bach allappoq.
Naleqqameersup Pele Brobergip aamma Nunatta Qitornaaaneersup Aleqa Hammondip nunarput tamatumunnga isumaqatigiinniarnermi ilaatinneqanngippallaarsorigaat, KNR-imit siusinnersukkut aamma oqaatigaarput
AAMMA ATUARUK Politikerit: Inatsisartut illersornissamut isumaqatigiissut takunngilaat
Aalajangigassani nunatsinnut tunngasuni kalaallit politikeriisa peqataatinneqartarnissaat, danskit naalakkersuisuisa arlaleriarlutik neriorsuutiginikuuaat.
Aleqa Hammondilli Pele Brobergillu nunarput qaaqquneqanngippallaarsoraat.
- Aali oqaatigineqartoq, illersornissamut aamma tunngatillugu uagut tusarniartassagaatigut, uagut nunarput pineqartarmat. Taamaammat taamaattoqaqqilernera uggornarpoq, ajoraluartumillu tamanna tupaallaatiginagu, Pele Broberg oqarpoq.
Illersornissaq pillugu isumaqatigiissummi nutaami isumaqatigiinneq Naalakkersuisut aamma Savalimmiuni Naalakkersuisut ataqatigiissaareqatigineratigut aamma USA-mut oqallisiginnittoqareerneratigut isumaqatigiissutaasoq allassimavoq.
Taannali aatsaat 'savalimmiormiut kalaallillu oqartussaasuisa' imarisaanik akuersineratigut atuutilissasoq, isumaqatigiissummi allassimavoq.
