Englandimi qinersiartuupput
Tuluit Nunaanni ministeriuneq David Cameron nuliilu Samantha qinersiviit ilaanni qinersiartoreerput, qinersivimmi Witneymi qinersiartoramik.
Cameronip unammillertaa Ed Milliband, sulisartut partiianni Labourimi siulittaasoq, nuliani Justine Thornton peqatigalugu Doncaster Northimi qinersivimmi SuttonVillage Hallimi aamma qinersiartoreerpoq.
Inunnik isumasiuinerit kingulliit takutippaat Cameronip partiia konservativiit, Millibandillu partiia Labour naligiittorujussuusut.
Qinersineq ammarneqaliivissoq nuna tamakkerlugu isumasiuisup Lord Ashcroftip kisitsisaataasa tamanna takutippaat, tassami partiit annerit taakku marluk tamarmik immikkut 33 procentinit taaguunneqarnissaat ilimagineqarami. Inuit 3000-it isumasiuinermi apersorneqarput.
Konservatiivit Labourilu kisimiillutik amerlanerussuteqavissinnaassagunanngillat, Tuluillu Nunaanni naalakkersuisuutitaqalerniarunik partiinik allanik suleqateqartariaqassallutik.
Tuluit qanoq qinersisimanersut pillugit kisitsisit siulliit Tuluit Nunaanni qinersiviit unnugu nalunaaqutaq arfineq-marlunut matuneqarpata saqqummiunneqarsinnaanissaat ilimagineqarpoq, qinersinermilu inernerit tamakkiisut aqagu ullaakkut aatsaat saqqummiunneqarsinnaanissaat ilimagineqarluni.
