Talibanit nunat tamalaat Hollandimi Haagimi eqqartuussivianni eqqartuussivilersuunneqaratarsinnaasut
´´Afghanistanimi siuttut Talibanit, nunat tamalaat Hollandimi Haagimi eqqartuussivianni eqqartuussivilersuunneqaratarsinnaasut, Australiap, Canadap, Tysklandip Hollandillu nalunaarutigaat, tamannalu pillugu Talibanit pillugit nunat tamalaat Haagimi eqqartuussivianni tusarniaasoqaratarsinnaalluni.
Australiap nunanut allanut tunngasunut ministeria Penny Wong, Naalagaaffiit Peqatigiit New Yorkimi ataatsimeersuarneranni taama oqarpoq.
- Talibanit inuttut pisinnaatitaaffinnik arnallu niviarsiaqqallu tunngaviusumik pisinnaatitaaffiinik ataqqinninnginnertik takutereerpaat, Penny Wong oqarpoq.
Arnanik assigiinngisitsisoqannginnissaa pillugu Naalagaaffiit Peqatigiit aalajangersagaannik Afghanistan unioqqutitsisoq nunat sisamat taakku tunngavilersuutiginiarpaat. Aalajangersagaq taanna nunanit tamalaanit akuersissutigineqarnikuuvoq.
Afghanistanip peqataanissaanik Wong kaammattuuteqarpoq. Isumaqatigiinniarnissallu ajalusoorpata, suliaq isumaqatigiissitsiniartartunut illuatungeriinnit ingerlateqqinneqarsinnaasoq aalajangersakkami allassimavoq.
USA-p Afghanistanimi sakkutuuni 2021-mi aggustimi angerlarteqqikkamigilli Talibanit islam tunngavigalugu inatsimmik sukannersumik Afghanistanimi atuutilersitsinikuupput.
Arnat niviarsiaqqallu killilersuiffigineqalernikuupput, parkinut ilisimatusarfinnullu orniguteqqusaajunnaarsinneqarsimallutik, soorlu aamma tamat ornissinnaasaanni erinarsoqqusaajunnaarsinneqarsimasut. FN-ip tamanna suiaassuseq aallaavigalugu assigiinngisitsinertut nalilernikuuaa.
Nunat allat 20-t, nunat sisamat Afghanistanimik eqqartuussivilersuussiniarnerannik tapersersuinertik New Yorkimi nalunaarutiginikuuaat.