Ajunaarnersuaq Emiliusip panimminik oqaloqateqarnini kingulleq puigunngisaannarpaa
Emilius Therkelsenip panimmi juunip 17-ani unnukkut qulinut tanneq arfineq-pingasunngortoq sianernera ulloq manna tikillugu puigunngilaa.
Tassami paniata, Maaliannguaq Therkelsenip, ajunaarnissani minutsialunnguit sioqqullugit, angunni, angajuni anaananilu oqarasuaatikkut oqaloqatigai.
Soorlumi naggataamik inuulluaqquinnarluta sianertoq, Emilius Therkelsen oqarpoq.
- Nuannaarpalulluni illarpaluttarlunilu oqarpoq; ataata avalaappakkit. Aperigakku sooq, akivaanga; ernutannguinuna ataatami pattagiaa toortortaaraa, avalaassassaaruttugut.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
Maaliannguup angajuni taamani Saattuniittoq aamma taama sianerfigaa:
- Nuannisarluni perpaluttut, soraluara illarpalulluni pattappaluttoq, Paneeraq Therkelsen oqarpoq.
Taassuma kingorna Maaliannguaq anaanaminut sianerpoq. Oqaluunnerannilu tassaarsuup Nuugaatsiaq anguaa.
Illuat savigussaavoq.
Paneeraq anaanaminit pisoq pillugu kalerrinneqareerami angumminut sianerpoq:
- (Paneeqqap, aaqq.) Oqarfigaanga 'ataata ajortoqarpoq. Maaliannguakkut anaana oqaluutiusaarlugu immaqa ajunaarput. Malissuunngooq aallaruppai'. Taama oqartorlu paatsiveeruppunga, Emilius Therkelsen oqarpoq.
Tassami Maaliannguaq, Piitannguaq ernertillu periarfeerunneqarput. Emilius Therkelsenikkullu soriarsinnaanatik utaqqiinnartariaqalerput.
Ullut nalorniffioqisut qulit qaangiutereersut matu kasuttorpoq:
AAMMA ATUARUK Pipaluup anini, ukuaasani soralussanilu arfininngormat unnukkut annaavai
AAMMA ATUARUK Sakkortuvoq kisianni naammagittarniarsarivunga
- Politiit takkupput. Ujaasinerooq taamaatippoq. Taava uanga kamassara tassani qanittuaraaraavoq, Paneeraq Therkelsen oqarpoq.
Ilaqutariit annaasamik timaasa nassaarineqarnissaat suli neriuutigaat. Pisoq ilaqutariinnut sakkortoqaaq. Taamaammat ilaqutariit Therkelsenikkut qanigisatik Uummannamiittut maanna nakussassaatigaat.
- Taakkoqanngippat immaqa sanngiittorujussuussagaluarpunga, nuannersumik tuniorartuartarmannga, Emilius Therkelsen oqarpoq.