Elite Sport Greenland: Timersortartut piginnaasaqartut amigaatigaagut
Taama aalajangiussineq pivoq, Elite Sport Greenlandip aallartitaasa tallimanngormat ataatsimiinneranni peqataasullu tamarmik tamanna isumaqatigalugu taasereerneranni.
- Apeqqutaanngilaq timersortartunut ataasiakkaanut aningaasanik amerlanerusunik tunisinissaq aammali pisariaqartinneqarpoq annertunerusumik ilisimasanik ilinniarnikkullu pissarsinissaq, qanoq suleriaaseqarluni ingerlatsisoqarnissaa taamatullu tamassuma anguniarnerani kajumilluni sulinissaq aamma pisariaqarluni, Elite Sport Greenlandimit tusagassiuutinut nalunaarumminni allapput.
AAMMA ATUARUK Ilinniarnertuunngorniarneq timersornertalik soqutigineqarluarpoq
Suleqatigiinneq pisariaqarpoq
Timersortartut piginnaasallit suli pikkorinnerulernissaat anguneqassappat, Nunatsinni timersoqatigiit kattuffii assigiinngitsut tamassuminnga suleqatigineqarnissaat pisariaqartoq, Elite Sport Greenland allapooq.
- Kattuffiit timersuutinilluunniit assigiinngitsunik suliaqartut suleqatigineranni tunngavissinneqassaaq, immikkut piginnaasallit qaffasinnerusumik inissisimalernissaat, Elite Sport Greenlandimit taama isumaqarput.
Aamma Elite Sport Greenlandimi siulersuisut kissaatigaat, Nunatsinni specialforbundinik oqaloqateqartarnerunissaq, taamaalilluni piginnaanngorsaanerit imaluunniit pilersaarutinut aalajangersimasunut toqqaannartumik aningaasaqarniarnermi ikorfartoqatigiilluni suleqatigiinnerunissaq anguniarneqarluni.
- Tamanna anguniagaq 2015-imi inerisarneqarluni aallartinneqarpoq, tassalu tamassuma maanna nangeqqinneqarnissaa aallartereerluni, Elite Sport Greenland allappoq.
Timersortartut ikittuinnaat aningaasanik tapersersorneqarput
Sisoraatinik ujakkaartartut Martin Møller aamma Karl Peter Kristensen Elite Sport Greenlandimit ullumikkut tapersersorneqarput aamma Nunattta nunanut allanut assammik arsartartui taamatut tapersersorneqarlutik. Taakku saniatigut timersortartut piginnaasaqarluartut arlalialuit tapersersorneqarlutik.
Futsalimik arsaattarneq maanna immikkut aamma pilersaarusiorfigineqarpoq siunniunneqarluni tamassuma siunissami qaffasissumik ingerlanneqarnerulernissaa.
