Qulaarpaa Atuartut atuarfimmi ajornartorsiutaanerpaapput

Meeqqat atuarfianni atuartut ajornartorsiutaanersaapput. Ilinniartitsisut aperigaanni tamanna akissutigineqarajuttarpoq.

Atuartut taakkulu pissusilersorneri atuarfimmi ajornartorsiutaanersaapput. Atuarfik pillugu nalilersuinermi angisuumi ilinniartitsisut amerlanerussuteqartut taama isumaqarput.

Nalilersuinermi ilinniartitsisut unammimmilligassanik annerpaanik pingasunik namminneerlutik oqaasertaleeqqullugit periarfissinneqarmata, akissutinit 203-usunit 122-t atuartut ajornartorsiutaanerat taavaat.

Atuartut pissusilersortarnerat annerusumik pineqarpoq. Atuartut kamassaqaqisut, atuarfimmut imaluunniit ilinniartitsisunut ataqqinninnginneq, qinngasaarisarneq, atuanngitsoortarnerit, ilinniarusussuseqannginneq, pimoorussilluni sulisinnaannginneq suleqatikkuminaannerlu ajornartorsiutaasarput.

Inuiaqatigiinni ajornartorsiortoqarneranut tamanna takussutissaasoq, nalilersuinermi oqaatigineqarpoq, tassami atuartut amerlasuut inooqataanissaminnut ajornartorsiormata, ajornerullunilu ilikkagaqarnissamut piumassuseqannginnerat.

Ilinniartitsisut atuartunut taamaattunut ilinniartitsiniarnertik ajornartorsiutigisaraat nalilersuinermi aamma tikkuarneqarpoq.

Ilinniartitsisut akisussaaffimminnik tiguserusuttannginnerat, angajoqqaat amerlasuut tikkuarpaat.

Angajoqqaat ilaat aamma ilinniartitsisuusoq nalilersuinermi ima allappoq:

- Peqatigiinnermik amigaateqartoqartoq peqatigiinnikkullu tamanna iliuuseqarfigineqassasoq oqartoqartarpoq. Oqaannarluni ajornartorsiut allamiittoq, ajornartorsiutip qaangerniarnissaanut naammanngilaq. Atuarfimmi atuartunik taamaattunik pilersitseqataasartugut eqqarsarpunga. Tassa isiginnaaginnarnitsigut iliuuseqannginnitsigullu, angajoqqaat ilaat nammineq aamma ilinniartitsisuusoq allappoq.

Akisussaaffimmik tiguserusuttannginnerlumi nalilersuinermi ajornartorsiutitut ilungersunartutut taaneqarpoq.

- Tamannalu siunissami iliuuseqarfiginiagassat immaqa pingaarnersarigaat, nalunaarusiami ilaatigut isummiunneqarpoq.