Assi: Thomas Veirum/KNR

AWG2016 Edvard Kruse qiterlimminnermi sølvinnappoq

Atuarfiup Ukaliusap Nuup illoqarfiata qiterpasissuaniittup timersortarfia ippassaq sisamanngornermi isiginnaarianik tattoqippoq. Edvard Kruse qiterlerminnermi sølvinnappoq.

Edvard Kruse Uummannap eqqaani Qaarsuneersoq Eqqillit pinnguaataanni angutit qiterlerminnermi unammineranni Nunarput sølvinnatsippaa.

Edvard Krusep unamminerni unammillertigisani oqinaaqattaareerlugit ujagaaniutivinnermi Christopher Martin Nunavik Québecimeersoq ajorsarfigaa.

Semifinalertoqarmat, kingorna bronzennattoq Alaskamiu Robert Strick unammivaa - Edvard Krusellu taanna ajornaquteqanngitsumik ajorsartillugu.

Robert Strickip Edvard Krusemut ajorsarnermi kingorna Christopher Martin unammivaa.

Christopher Martin tassani ajugaavoq, taamaammallu kuulti sølvilu Nunatsinnut Nunavik Québecimullu tunniunneqartussanngorlutik.

Christopher Martinimut unammisoqalermat Atuarfik Ukaliusap timersortarfiani pissangarrattoqarpoq, Edvard Krusellu illersorterpassuaqarnera ersarivippoq. Taamaammat aamma ajorsarmat timersortarfimmi anersaammisut amerlaqaat.

Ajorsarnerata kingorna, kalaallit sungiusaasuata Alfred Lindenhannip dommerit oqaloqatigai. Kalaallimmi unammisartui isumaqarput Christopher Martin aallartiaarsimasoq - unammisummi arriitsumik sallaatsumillu aallartittussaagaluarmata. Kalaallit unammisartut isumaqarput Christopher Martin sakkortuallaamik - sukkavallaartumillu - aallarterisimasoq.

- Sukkavallaalaartumik aallartinnasoraara, Edvard Kruse unamminerup kinguninngua KNR-imut oqarpoq.

Alfred Lindenhannip tunngavilersuinera iluaqutaanngilaq, dommerillu Christopher Martin qiterlerminnermi ajugaasutut suaarutigaat.

Ujaminnatsitsisoqareersoq sungiusaasup Alfred Lindenhannip unammisartumi ajorsartitaanera suli akueriuminaatsippaa.

- Edvardip iluarinngippagu aamma uanga iluarissanngilara, Alfred Lindenhann oqarpoq, ilanngullugulu oqaatigaa Edvard Krusep ajorsartitaanini akuerereeraa.

Isummersuutit