Dundas: Amerikamiut mingutsitartik akilissanngilaat
Suliffeqarfik Per Aarsleff Grønland Aps amerikamiut Thulep eqqaani Dundasimi eqqaavikuannik saliinermik suliassinneqarpoq.
- Saliineq Danmarkip naalagaaffiata akilissavaa tassungalu 40 millioner koruunit immikkoortinneqarput, nunamut namminermut, pinngortitamut avatangiisinullu naalakkersuisoq Anthon Frederiksen KNR-mut oqarpoq.
Dundasimi saliinissaq pillugu isumaqatigiissut siornatigut avatangiisinut ministerip Venstremeersup Karen Ellemannip aamma Anthon Frederiksenip siorna atsioqatigiissutigaat.
Tamatuma kingorna ammasumik suliarinnittussarsiuussineq ingerlanneqarpoq tassanilu suliffeqartik Per Aarsleff Grønland Aps suliarinnittussanngortinneqarpoq. Eqqakkat nuisasut ukiormanna piiassavaat saliinerlu annertunerusoq aappaagu ingerlanneqassalluni.
- Aarleqqutigineqarsinnaavoq eqqakkanik avatangiisinut ulorianartunik soorlu radioaktiviusunik nunap iluaniittoqarsinnaanera. Taamaammat Danmarkip naalagaaffianut isumaqatigiissummi ilaatipparput saliineq ilimagisamit annertunerussappat tamatuma isumaqatigiinniutigineqaqqissinnaanera, Anthon Frederiksen oqarpoq.
Eqqakkat ulorianartut, savimernit nunalu mingutsinneqarsimasoq Danmarkimukaanneqassapput tassani suujunnaarsinneqassallutik. Pilersaarutit malillugit saliineq 2014-mi naammassereersimassaaq.
Amerikamiut raketinut aallartitsisarfik Dundasip qeqertaasaaniitinnikuuaat taannalu maanna piiarneqareerpoq. Dundasimik atuisinnaaneq kalaallinut 2001-mi tunniunneqarpoq.
