Dublinimi eqqissiviilliortoqangaatsiarnerani inuit 34-t tigusaasut
Irlandip illoqarfiisa pingaarnersaanni Dublinimi sisamanngornermi unnukkut eqqissiviilliortoqangaatsiarmat inuit 34-t politiinit tigusarineqarput.
Taakkunannga 32-t eqqartuussivimmut tallimanngornermi sassartinneqarumaarput.
Dublinip politiivini politikommissæri tusagassiortunik tallimanngornermi ullaakkut katersortitsinermi taama oqarpoq.
Dublinip qiterpasissuani sisamanngornermi savilersortoqareersorlu eqqissiviilliortoqalerpoq. Inuit tallimat savilersortoqarnerani ikilerneqarput. Taakkunannga pingasut meeraapput, politeerlu ataaseq. Ikilerneqartut tallimassaata kinaassusaa saqqummiunneqanngilaq.
Saassussisup nunanit allaneersuunera tusatsiakkat naapertorlugit oqaatigineqareersorlu eqqissiviilliortoqalerpoq.
Sooq saassussisimanersoq saqqummiunneqanngitsoq
Irlandimi ukiut qulikkaat kingulliit ingerlaneranni aatsaat taama sakkortutigisumik eqqissiviilliortoqartoq Dublinimi politiit oqaatigaat.
Pinerlunniat talerperliunianeersut Irlandip illoqarfiisa pingaarnersaanni eqqissiviilliortitsisuusut, politikommissærip Drew Harrisip tv-qarfimmut RTE-mut oqaatigaa.
Angut Dublinip qiterpasissuani illoqannginnersami Parnell Squaremi savilersulersoq paasissutissat maannamut saqqummiunneqartut naapertorlugit nalunaarutigineqarpoq.
Savilersornerarneqartoq saassussereernerup kingorna erngertumik tigusarineqarpoq.
Sooq saassussisimanersoq saqqummiunneqanngilaq.