Imaani akunnerni 48-ni pissanganartorsiorneq

F/V Saputi putulluni lasteqarfimmigut immalermat, Issittumi Sakkutooqarfiup umiarsuaq alapernaarsuut Knud Rasmussen ikiuiartortippaa, taassumalu kilisaat Nuummut ingiallorpaa. 

Peqatigisaanillu canadami oqartussaasut kilisaatip puttatinniarnerani ikiortaasussanik pumpinik timmisartoq atorlugu assartuipput. 

Knud Rasmussen ataasinngornermi ualigaa Saputimut annguppoq, sumiiffimmilu silap anorlerpallaannginnera pissutigalugu, kilisaatip kivinissaa aarleqqutigineqanngimmat,  taanna Nuup tungaanut ingerlaannarpoq.

Aamma atuaruk ASSIT Canadamiut kilisaataat Nuummut apuutereerpoq

Ullullu tulliani silapilulernerani pissutsit pissanganartorsiorfiulerput, Issittumilu Sakkutooqarfiup kilisaatip puttatiinnarniarnera silapilummit ajornakusoortinneqartoq oqaatigaa.

Air Greenlandillu helikopteria annaassiniartartoq Saputimi inuttaasut annaanniarnissaat pisariaqalissappat qanittumiitinniarlugu, Kangerlussuarmit Nuup tungaanut aallartinneqarpoq, silapilunneralu pissutigalugu Nuummut ingerlaarnissaq navianarpallaalermat, taanna Maniitsumut sangutinneqarpoq.

Pumpit kilisaammiittut malinnaaniapiloorput, atortuulillu pisariaqanngitsut avammut eqqarneqarput. Inuttat sisamat Knud Rasmussenimut nuunneqarput, gummibådilu atorneqartoq annertuumik akornuserpoq atoqqinneqarsinnaajunnaarlunilu.

Aamma atuaruk Canadamiut kilisaataat iluliamut aportoq

Issittumilu Sakkutooqarfiup helikopteri annaassiniartaat aallartippaa, silalli sermernartuliornera pissutigalugu taanna Nuummut ingerlatiinnarneqarpoq, tassanilu silagissinissaa utaqqivaa. 

Canadamiut timmisartuat assartuut pissutsinik alapernaarsuitinniarlugu sumiiffimmukartinneqarpoq, kilisaallu immappallaarnaveersaarluni kigaatsumik ingerlaarpoq.  

Nalunaaquttallu akunnerini 48-ni pissanganartorsiortoqareersoq Saputi marlunngormat unnukkaa Nuummut annguppoq.