ASSIT Canadamiut kilisaataat Nuummut apuutereerpoq

Canadamiut kilisaataat F/V Saputi, Davisstrædemi sapaatiummat ilulissamut aportoq putusoortorlu umiarsuarmit alapernaarsuummit Knud Rasmussenimit qaniorneqarluni Nuummut ippassaq unnukkut nalunaaqutaq qulingiluanut apuuppoq. Issittumi Sakkutooqarfik KNR-imut taama ilisimatitsivoq.

Allattoq Karsten Sommer

februaarip 24-at 2016 07:15

Nutserisoq Simon Uldum -

Umiarsuaq uingasupilussuuvoq maannalu Nuummi amutsiviup eqqaaniilluni.

Inuttat tamarmik canadamiuupput - taakkunannga arfineq-marluk Nunavummiuullutik - tamarmillu ajoqusersimanngillat.

Inuttat ilarpassui Nuummut ingerlaarnermi annanniutit atorlugit umiarsuarmut alapernaarsuummut Knud Rasmussenimut nuunneqarsimapput, Nuup tungaanut ingerlaarnermi silarlunnera pissutigalugu umiarsuup kinngusoorutigineqaratarsinnaanera aarlerineqarmat, Jesper Øraker Blue Water Shippingimeersoq umiarsumillu Nunatsinni sullissisuusoq taama oqaluttuarpoq.

Aamma atuaruk Canadamiut kilisaataat iluliamut aportoq

- Ippassaq unnukkut tikikkamik qasusupilussuupput tamarmillu Sømandshjemmimut inissinneqaput, Jesper Øraker oqarpoq.

Passinik nakkutilliinissaq allallu ullumikkut isumagineqassasut Nuummi politiit ilisimatitsipput.

Inuttat Nuummiiginnassanersut suli aalajangiiffigineqarsimanngilaq. Kilisaatip iluarsaanneqarnera qanoq sivisutigissanersoq apeqqutaassaaq.

Canadami annaassiniartartut SAR Davis Strait kilisaammik ikiuinerannik videoliaq ataani isiginnaarneqarsinnaavoq: