Tunumi toqutsisoqarnera pillugu suliat upalungaarsimasuutitat sulisinneqalerneranik kinguneqartoq
Ukiup nutaap aallartinnerani sapaatit akunnera siulleq tunumi imaannaanngitsunik pisoqarfiuvoq.
Jannuaarip aallaqqaatani nunaqarfimmi Sermiligaami angut 18-nik ukiulik tigusarineqarpoq angumik 42-nik ukiulimmik toqutsisimasutut pasineqarluni.
Ullut marluk qaangiummata angut 48-nik ukiulik Tasiilami inissiami toqungasoq nassaarineqarpoq kinguninngualu inooqataa tigusarineqarpoq toqutsisimasutullu pasineqarluni.
Pisut alianartut marluk pissutigalugit Tasiilami nunaqarfiinilu upalungaarsimasuutitat sulisinneqalerput.
AAMMA ATUARUK Tasiilami toqutsineq pillugu suliaq: Aapparisaa ulluni 28-ni tigummigallagassaassasoq
- Tassa imaappoq, Sermiligaami Tasiilallu illoqarfiani ilaquttat qaniginerpaasat isumassorneqalerput. Immikkoortumi pisortaq Hjørdis Viberg, kommuneqarfik Sermersuup tusagassiuutinut nalunaarutaani taama oqarpoq.
Sila pitsanngoriarpat, sulisut Tasiilameersut Sermiligaaliassapput, tarnip pissusiinik ilisimasalimmik angalaqateqarlutik.
Tasiilami tarnip pissusiinik ilisimasallit marluk psykoterapeutilu ataaseq piareersimatinneqarput ilaqutaasunik allanillu pisimasumut nalaataqartunik ikiorneqarnissaminnik kissaateqartunik ikiuuttarlutik.
Alianartorsiortillugu oqaloqatigiittartut upalungaarsimasuutitallu
Tasiilami atuarfimmi ajornartoornermi upalungaarsimasuutitat sulinerat aallartinneqarpoq, atuarfik aamma atuarfimmi tarnip pissusiinik ilisimasalik suleqatigalugu alianartorsiortoqartillugu oqaloqatigiittartunik pilersitsisoqarluni.
Inuusuttut arlaatigut attortissimasut Inuusuttunut kulturikkullu illorsuarmi inersimasunit isumassorneqarput.
Hjørdis Vibergip oqarnera naapertorlugu, siorna coronamik ajornartoortoqarnerani upalungaarsimasuutitat sulinerisa iluaqutaatigineranik nukittorsaaqataasimasoq.
AAMMA ATUARUK Sermiligaami toqutsineq: 18-inik ukiulik januaarip 27-anut tigumigallarneqartoq
- Taamatut sakkortutigisunik pisoqartillugu iluaqutaajuaannarpoq, kisiannili tamassuma qiterpiaa paasillugu pitsaasuuvoq, ullumikkut ikiorneqarnissaminnik pisariaqartitsisunut neqerooruteqarsinnaagatta. Taamaaliorsinnaasimanngilagut ukiut pingasut matuma siornagut.
Najukkami iliuuseqarnerit saniatigut, sapaatip akunnerata tulliani meeqqanik sullissisartut illoqarfimmut tikissapput, pilersaarutaasumik angalanissaq malillugu.
Tarnip pissusiinik ilisimasallit marluk tikissapput, persuttaasoqarsimanerata ajornartoortoqarnerata kingunerisaanik oqaloqatiginninnermik, aammalu inuit ajornartoornermik nalaataqartut qanoq ikiorserneqartarnerannik misilittagaqartut.
