DR Nuummit inuusuttulersaarummik nangeqattaartuliortoq
Nangeqattaartuliaq arfinilinnik immikkoortoqarpoq, taakkulu akunnerup affaanik sivisussuseqarput. Inuusuttut 18-it 29-llu akornanni ukiullit isertugaatitik nangeqattaartuliami "Isertugaatit Nuummeersut"-mmi oqaluttuaraat.
Nunatsinni inuusuttut danskit tusagassiuutaannit sammineqanngippallaaqaat, Nordisk Filmimi aallakaatitassiortoq, DR-ilu sinnerlugu nangeqattaartuliartuusoq, Caroline Una Henningsen, taama oqaluttuarpoq.
- Issiaqatigiilluta oqaluuseraarput tv-kkut sammineqartartut tassatuaasut Juullimut inuulluaqqusinerit kunngikkormiullu tikeraartarnerat. Taakku kisiisa eqqaasinnaavagut, Kalaallit Nunaannili inuusuttut inuunerannik aallakaatitassiortoqarsimaneranik eqqaasassaqanngilagut.
Misiliutaasumik immiussinermut peqataasorpassuit
Taamaammat tv-liortut Nuummi ilinniarnertuunngorniarfimmi misileraaniarlutik aalajangerput, ilinniartullu namminneq kajumissutsiminnik inimi kisimiillutik filmiliuutip saavani isertugaatiminnik oqaluttuartinneqarput.
- Isertugaatit assigiinngitsorpassuit tassani oqaluttuarineqarput. DR-imullu nangeqattaartuliornissamik isumassarsiarput ingerlaannaq akueritipparput. Taava Kalaallit Nunaannukarpugut isertugaatinik katersuiartorluta, Caroline Una Henningsen taama oqarpoq.
DR3 Danmarkip Radioata inuusuttunut tv-kkut kanaleraa Danmarkimilu inuusuttut inuunerat ukiuni sisamani aallakaatitassiarisarsimallugu.
Nangeqattaartuliarlu Nunatsinni immiussaagaluartoq, isertugaatigineqartut nunanut allanut naleqqiullugit allaanerungaanngitsut, Caroline Una Henningsenip oqaatigaa.
- Oqarsinnaavunga inuunermi akunnattoorutaasartut nalinginnaasut pineqarmata, aammalu isertugaatit kikkulluunniit pigisinnaasaat. Aammali ilaat annertunerusunik isertugaateqarput, amerlanersaalli Thyborønimi, Københavnimi Odensemiluunniit, allanilumi aamma, pisinnaapput.
Isertugaatilli nammineq pigisat pineqaraluartut, peqataanissaq akunnattoorutigisallu allanit tarrarsorfigineqarnissaat assut soqutigineqarsimavoq.
- Oqaloqatigiinnerit siulliit pereeraangata oqaloqatigisagut assut oqaluukkuminartarput peqataarusullutillu. Qujanartumik. Tamanna assut nuannerpoq.
Aallakaatitassiortut immikkoortut pingasut immiussimalereerpaat immikkoortullu kingulliit pingasut Nuummut aggustimi immiukkiartussamaarpaat.
Nangeqattaartuliaq “Isertugaatit Nuummeersut" DR3-kkut ukioq manna novembarip 13-iani takuteqqaarneqassaaq.
