Doris: Palasi kalaallisut oqaaseqartuussaaq
Siumut tunuliaqutaralugu Folketingimut ilaasortap Doris Jakobsenip tamanna kissaammissutigaa, ilageeqarnermullu ministeri Manu Saren (R) nassuiaateqaqqullugu allaffigisimallugu.
-Kalaallit Danmarkimiittut ilagiinnut tunngatillugu oqaatsitigut ajornartorsiuteqarnerat pissutigalugu atorfik pilersinneqarpoq. Palasip tarninik kiffartuussisutut atuunneranut tunngatillugu aamma ajornartorsiutitaqassaaq, danskisummi oqaaseqarpat attaveqaqatigiinneq annikitsuinnaanngikkuni pisinnaanngivissorsinnaammat. Tamannarpiarlu pissutigalugu palasitaassap kalaallisut oqalussinnaanissaa pingaaruteqarluinnarpoq. Allatut pisoqassappat eqqumiissaaq, Doris Jakobsen mamiatsassimaqaluni erseqqissaavoq.
Kalaallisut oqalussinnaasunik qinnuteqartoqanngippat, qinnuteqartut Kalaallit Nunaanneersut pisataannik nuussinissamut aningaasaliisoqarnissaanut Ilageeqarnermut ministeriaqarfik Doris Jakobsenip kaammattorpaa.
-Kalaallit Nunaanni palasitut atorfiit inuttaqanngitsut pigaagut, paasitinneqarnerali naapertorlugu innuttaasut tamaasa sullinneqarnissaat qulakkeerneqarsimavoq. Palasimik kalaallisut oqalussinnaasumik Danmarkimi nassaartoqarsinnaasuuppat pitsaanerpaassagaluarpoq, Kalaallit Nunaanniilli qinnuteqartoqartitsisariaqartoqarsinnaavoq, Doris Jakobsen nassuiaavoq.