Doris Jakobsenip nakorsat aningaasarsiaqarnerulernissaat itigartitsissutigaa
Peqqinnissakkulli kiffartuussinerit massakkutut isikkoqartillugit allanngortinneqarnavianngitsut, Peqqinnissamut naalakkersuisup Doris Jakobsenip AG-mut ullumi saqqummersumut oqaatigaa:
- Peqqinnissakkut kiffartuussinerup maanna atuuttup allanngortinneqarnissaanik maannakkorpiaq pilersaaruteqartoqanngitsoq, Peqqinnissamut naalakkersuisoq Doris Jakobsen oqarpoq.
Nakorsat aalajangersimasumik atorfinitsinneqartartut sulisussariniarnerannut ajornartorsiutit pillugit naalakkersuisoq AG-mut taama oqarpoq, nakorsanimmi aalajangersimasunik sulisussarsiornermi ajornartorsiutit kingunipilui aviisip sapaatip-akunnerini kingullerni allaaserimmagit.
Aamma atuaruk Nunaqarfinni peqqissaaviit immikkut sammineqartut
Aamma atuaruk Tarnikkut katsorsaanermi pissutsit ataatsimiititaliap misissortikkusukkai
Nakorsanilli sulisussaqarniarnermi unammilligassat annertoqisut naalakkersuisup nassuerutigaa, nakorsatummi atorfinnit 100-t missaanniittunit 50-init amerlanerusut taartaasartunik inuttaqartinneqarmata.
Sinerissami peqqissaaveqarfinnut minnerusunut tamanna pingaartumik ajornartorsiortitsivoq, tamaani nakorsanik pissarsiniartarnerup ajornakusoornerujartuinnarmat.
Aningaasarsianik unammillersinnaanerusunik pisariaqartitsisoqarnera nakorsat kattuffiata siulittaasuata Ole Lindip siusinnerusukkut erseqqissaatiginikuuaa. AG taama allaaserisaqarpoq.
Nakorsat Kattuffiat Peqqissutsimullu Naalakkersuisoqarfik suleqatigiissitamik pilersitsisimanerat Doris Jakobsenip erseqqissaatigaa, nakorsat sulinerminni atugassarititaat suleqatigiissitamit misissorneqaleruttorlutik.
Telemedecinip ineriartortinneqarneratigut peqqinnissakkut sullissinermi immersoqatigiittarneq immikkullu ilisimasalinnit kiffartuussineq ajornannginnerulersoq taassuma aamma erseqqissaatigaa.
