Doris Jakobsen: Inatsisip sukaterneqarnissaanut piffissaanngilaq

Naak pujortartarnermut inatsisip sukaterneqarnissaanut siunnersuut ajunngitsumik siunertaqaraluartoq, inatsisip sukaterneqarnissaanut maanna piffissaanngilaq. Siumut sinnerlugu inatsisartunut ilaasortaq Doris Jakobsen, Inuit Ataqatigiit sinnerlugit inatsisartunut ilaasortap Juliane Henningsenip siunnersuutaanut taama oqarpoq.

Sulisut pujortartarunnaarnissaannut suliffeqarfiit annertunerusumik sungiusartitsisalernissaat, sulisullu timigissartarfiliartarnissaannut suliffeqarfiit akileeqataasalersinnaanissaat taarsiullugu Doris Jakobsenip siunnersuutigaa.

- Inatsisit ullumikkut suliareriikkavut ilaatigut annertoorujussuarmik malinneqanngitsut, Namminersorlutilluunniit Oqartussat silataanni ingerlareersut qaavatigut suli sukateriqqinnissarput tulluartuunngitsoq isumaqarpunga. Akerlianik inuit pujortarunnaarnissaat anguniarlugu suliffiup iluani timersornernik, taavalu aamma pujortartarnerup unitsinneqarnissaanut pikkorissaanerit ingerlanneqarpata imminut akilersinnaanerusoq uanga isumaqarpunga, Siumut sinnerlugu Inatsisartunut ilaasortaq Doris Jakobsen oqarpoq.

Nunatsinni pujortartarnermut inatsisip sukateqqinneqarnissaa, Juliane Henningsenip IA-meersup piumasaraa. Maannami inatsisaasoq ima iluatsilluarsimatigimmat, alloriaqqinnissamut piffissanngorsimasorigamiuk.

Nunatsinnimi inersimasut 66 procentii pujortartarput, Juliane Henningsenilu isumaqarpoq amerlavallaarput.

- Nunatsinni pujortartartut siunissami ikinnerujussuanngortinneqartariaqarput, innuttaasullu peqqinnerulertariaqarlutik, Juliane Henningsen tusagassiuutinut nalunaarummini ilaatigut taama allappoq, nunallu allat pujortarfiujunnaavinnissamik siunniussaqartut innersuussutigalugit, soorlu New Zealandimi 2025-nngortinnagu pujortartartuerutivinnissaanik siunniussineq assersuutigalugu.

Inatsilli maanna atuuttoq sukaternagu sulisut pujortartarunnaarnissaannut suliffeqarfiit annertunerusumik sungiusartitsisalernissaat, sulisullu timigissartarfiliartarsinnaanissaannut suliffeqarfiit akileeqataasalernissaat, Doris Jakobsenip aqqutissaasoraa, Juliane Henningsenillu isuma taanna ajorinngikkaluarpaa, imatullu nangilluni:

- Pitsaaliuineq aammalu sulisunik tinnersaaneq pujortarunnaarsitsiniaanerlu taanna soorunami ingerlaavartuuvoq, kisianni inuiaqatigiittut akisussaanitsinni tamatta ornittakkavut, tamatta aqqusaartakkavut isumaqarpunga pujortarfiussanngitsut. Aamma isumaqarpunga inuiaqatigiinni peqataasunut iluaqutaaginnarsinnaasoq taamatut aaqqissuussigutta, Inuit Ataqatigiit sinnerlugit Inatsisartunut ilaasortaq Juliana Henningsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat