Kingornussassanik Danmarkimi suliarinnittarnerit Doris Jakobsenip aaqqiissuteqarfieqquai
Angutip maanna toqoreersup paniata, kingornussassanik suliarinninnerup naammassinissaa ukiuni aqqanilinni utaqqisimavaa, Folketingimullu ilaasortaq Doris Jakobsen, Siumut suliaq pillugu oqaluttuussimallugu.
Taassuma suliaq maanna Folketingimi inatsisinut atuutsitsinermut ministerimut apeqquteqaateqarnikkut apuuppaa.
Suliaq pinartoqanngilaq, tassami kingornussisussat akornanni isumaqatigiinngittoqanngilaq, allanilluunniimmi suliamut kinguarsaataasinnaasunik suliassartaqarani. Suliaq ukiuni kingullerni aqqanilinni Nanortalimmiit Narsamut, Qaqortumut maannalu Kommuneqarfik Sermersuup eqqartuussiveqarfianut apuussimalluni.
Tamanna tunngavigalugu Doris Jakobsenip inatsisinut atuutitsinermut ministeri Mette Frederiksen nassuiaateqaqqullugu qinnuigisimavaa. Ilutigitillugulu ministerimut nassuiaqqullugu suliat tamakku suliarineqartarneri Kalaallit Nunaanni Danmarkimilu assigiinngitsumik suliarineqartarnersut.
"Eqqartuussivimmi kingornussassat pillugit suliaq naliginnaasoq ukiuni aqqanilinni suliarineqarsimanera ingasappallaaqaaq. Toqukkut qimanneqartunut eqqunngitsuliorneruvoq, isumaqarpungalu eqqartuussiveqarnermut ministerip taamatut pisoqaqqinnginnissaa qulakkeerniarlugu piaartumik iliuuseqartariaqartoq. Neriuutigaara kingornussassat pillugit Kalaallit Nunaanni eqqartuussivinni suliaqartarnerit Danmarkimi pisartuniit quleriaammik sivisunerusumik nalinginnaasumik sivisunerusanngitsut, Doris Jakobsen oqarpoq, neriullunilu ministeri piaartumik nassuiaateqarumaartoq.
