Doris J. Jensen: Siumumik pasinarsaarineq unitsittariaqalerpoq
- Malunnartumik nunatsinni tusagassiorfiit akulikilliartuinnartumik inuk toqqaannarlugu malersugaralugu ingerlanneqaleraluttuinnartoq tamatumanilu Siumumi ilaasortat ataasiakkaat eqqugaasaqattaalersimapput.
Siumup tusagassiuuteqarneq pillugu oqaaseqartartua, Doris Jensen tusagassiuutinut nalunaarummi oqarpoq.
Aviisi Sermitsiaq KNR-ilu partiip Inatsisartuni Naalakkersuisuinilu ilaasortai pillugit piffissami kingullermi saqqummersitsillattaapput.
AAMMA ATUARUK Tusagassiuutit: Politikerit pisortanit tapiiffigineqarlutik aalisariutersisut
Aviisip Sermitsiap Siumumi ilaasortat pingasut tassa Karl Kristian Kruse, Nikkulaat Jermiassen aamma Henrik Fleischer Namminersorlutik Oqartussanit taperneqarlutik namminneq pissaminnik angallatersisimasut saqqummiuppai. Tamatuma kingunerisaanik suliaq tusagassiuutit pillugu tusagassiinermut tunngasunik aalajangiisartuntu ingerlateqqippaat.
Tamatuma kingorna Kim Kielsenip biiliminik atuinera pillugu KNR-imit ilanngutassiortoqarpoq.
Tamanna pissutigalugu Siumup naammalernerarpaa.
- Tusagassiorfiit nutaarsiassalerinerat soorunami pingaarnersiuinermik tunulequtaqartuaannarpoq, taamaattoq ajoraluartumik malunnarpoq oqaluttuat pineqartut piffissalernerat eqqumiiginarsinnaasoq. Ajornanngippallaalerpoq aamma soqutigittaanneruvoq sukkavallaartumik qulequtaliornikkut inuiaqatigiit avissaartuunnissaat anguniarlugu tusagassiortoqalermat, Doris oqarpoq.
Nutaarsiassaqartitsinermi pisortaq: Siumut nunatta partiivisa annersaraat
KNR-ip nutaarsiassaqartitsinermi pisortaata, Mikkel Bjarnø Lundip Siumut immikkut ukkatarineqarnera nassuiaatigaa:
- Siumut nunatsinni partiini annerpaaginnarnani nunatsinni naalakkersuisooqatigiinni partiini aamma annersaavoq. Nunatta ineriartorneranut immikkut akisussaaffeqarlutillu allanit tamanit pissaaneqarnerupput. Taamaammat qanoq pissaanermik atuinerat pillugu tusagassiuutinit immikkut aamma ukkatarineqarpoq, nutaarsiassaqartitsinermi pisortaq oqarpoq.
Doris J. Jensenip aamma Namminersorlutik Oqartussani Naalakkersuisut Siulittaasuata Naalakkersuisoqarfiata oqarnerat naapertorlugit Kim Kielsenip biilinik atuineranut paasissutissat eqqunngillat.
KNR-ip Namminersorlutik Oqartussanit allagaatit pissarsiarisai ilanngutassiami aamma tunuliaqutarineqartut KNR-imit misissorluarneqalerput.
AAMMA ATUARUK Kielsenip biilii nunap karsiata 700.000 koruuneerutigigai
- Paasissutissat saqqummiussagut apeqquserneqarput. Misissuleruttorpagut, sulili inerniliissuteqanngilagut, Mikkel Bjarnø Lund oqarpoq
- Takusinnaasagut naapertorlugit kisitsisaataat uagut aamma naligiississinnaanngilagut, kisianni kina eqqornersoq paasiniarlugu paasissutissat piviusut misissoqqileruttorpagut.
Kim Kielsenip biilinik atuinera pillugu KNR-imit piffissami matumani saqqummersitsinermut atatillugu nutaarsiassaqartitsinermi pisortap coronap ilungersunartorsiortitsinera sulisunillu amigaateqarneq nassuiaatigaa. Kim Kielsenip biilinik atuineranut allagaatit KNR-ip ukioq manna januaarimi pissarsiarai.
Sermitsiaq.AG-p Dorisip isornartorsiuinera ilisarinngilaa
Sermitsiaq.AG-p aaqqissuisuunerata pisortaatalu, Christian Schultz-Lorentzenip Doris J. Jensenip isornartorsiuinera ilisarisinnaanngilaa:
- Doris J. Jensenip tusagassiuutinik isornartorsiuinera Siumumillu nalinginnaasumik malersuisoqarneraanera ilisarisinnaanngilluinnarpara. Siumut soorunami partiinit allanit ukkatarineqassaaq. Siumut naalakkersuisooqatigiinni partiini annerpaavoq. Tamanna pillugu ukkatarineqarpoq. Pissaaneqarnerusunut taamattarpoq. Allaanerusinnaanngilaq, taanna oqarpoq.
Naqqiineq: Christian Schultz-Lorentzenip taaguutaa allanngorpoq. Taanna aaqqissuisoqarfiani pisortaanani aaqqissuisuunerullunilu pisortaavoq. Knr.gl-ip kukkuneq ajuusaarutigaa.
