Donald Tusk EU-p præsidentiatut qinigaaqqittoq
![](/sites/default/files/styles/image_934x467/public/article_images/img_3520.jpg?itok=-jIiAIMu)
Tusk EU-mi præsidentiunissaanik, nunat EU-mi ilaasortat naalakkersuisuini siulittaasut Bruxellesimi sisamanngornermi ataatsimiinneranni aalajangerput, nunat 27-it isumaqataallutik taasipput nunat ataaseq taaseqataanngitsoq.
Tusk EU-mi præsidentimut qinigaaqqinnissaanut Polenimit tapersersorneqannginnissaa ilisimaneqareerpoq.
EU-milu inatsisartut taasitinneqarnissaat sioqqullugu erseqqissumik paasinarsinngilaq, Polen akerliulluni taasissanersoq taaseqataassannginnersorluunniit.
Donald Tusk EU-mi præsidentimut qinigaaqqinnermi kingorna attaveqaqatigiittarfimmi Twitterimi ima allappoq.
- Tatiginninnermik ajunngitsumillu ersersitsisoqarneranut qujamasuppunga. EU-p ajunnginnerunissaanut pisinnaasara tamaat iliuuseqarniarpunga, Donald Tusk Twitterimi taama allappoq.