DNA Inuup saneqaataasa ilisarnaataannik qitiusumik nalunaarsuiffimmut nunarput ilanngutissaaq
-Naalakkersuisuninngaanniit pingaartipparput inuiaqatigiit toqqissisimasumik inooqataanissaat, Inatsisinut atuutsitsinermut Naalakkersuisoq, Mala Høy Kuko oqarpoq.
Taassuma inuup saneqaataasa ilisarnaataannik qitiusumik nalunaarsuiffimmut nunarput ilanngutissasasoq ullumi Inatsisartunut siunnersuutigaa.
- Politiit suliaat pitsaanerusumik ingerlalissapput. Soorlu pasilliinerit, pinerluttunik nassaanngiinnerit, pasisanik nassaarinninneq assigisaallu sukkanerusumik pisinnaavoq, naalakkersuisoq oqarpoq.
Politiit sulinerminni atugaat pitsaanerulissasut Mala Høy Kuko isumaqarpoq, pinerluuteqarsimasullu nanineqarneq ajortut sukkanerusumik nanineqartalernissai neriuutigaa.
- Maaniinngikkaluarpat, soorlu Qallunaat Nunaanniikkaluarpat, taava DNA atorlugu aamma sukkanerujussuarmik pinerlussimasut nassaarineqartalissapput, Mala Høy Kuko oqarpoq.
Pinerluttulerinermi inatsit ukioq kingulleq 4105-eriarluni unioqqutitsivigineqarsimavoq, taakkunanilu suliat 1216-init paasineqarnikuunatik. Maaniipput aamma suliat pisoqalinikut suliallu uppernarsarneqarsinnaanngitsut.
Inuup saneqaataasa ilisarnaataannik qitiusumik nalunaarsuiffimmut ilanngunnissaq Nuup politiivini unnerluussisussaatitaasut pisortaat ima oqarpoq:
Qularinngilluinnarpara pinerluttoqarsimatillugu suliagut ajornannginnerusumik naammassisalissagigut. Pinerluttoqarsimatillugu inuit soqutiginarsinnaasut ajornannginnerusumik attavigisinnaavagut, kisianni aamma pasilliinerit pinngitsoortissinnaallugit, Morten Nielsen oqarpoq.
Nunatsinnilumi pinerlunnerit nalaatsornerinnakkut paasineqarnikut pereerput.
- Suliaqareerpugummi inuup saneqaataasa ilisarnaataannik tigummiaqarluta, kisianni pinerluttuusimasinnaasumik pasisaqarata. Nalaatsornerinnakkulli Qallunaat Nunaanni nalunaarsuiffimmi pigivaat, taamaasillutalu aamma pinerluttoq nassaarivarput, unnerluussisussaatitaasoq oqarpoq.
Aamma atuaruk Louise Hegelund pillugu eqqartuussineq aqagu ingerlanneqassaaq
Nuna tamakkerlugu inerluttulerinermi inatsimmik unioqqutitsinerit 2015-imi 4105-iusimapput, kisitisillu Nuup politiianit pissarsiaraagut.