DMI-p Tasiilami silap qanoq innissaanik ilimasaaruteqartarnini pitsanngorsaraa
Nunammi ilusaa allanngorartupilussuaq pissutigalugu Tasiilami piterartarpoq, tamatumalu ilimasaarutiginissaa imaannaanngitsuusarluni, DMI taama allaaserisaqarpoq.
Piterartillugu sumiiffinni imminnut qanittuaqqani anorip pissusia allanngorartupilussuusinnaasarpoq, taamaammat silarlunnissaanik anorersuarujussuarnissaanilluunniit ilimasaaruteqarnermut atatillugu tamakku qanoq innissaat siulittuutigissallugit ajornakusoorsinnaasarluni.
AAMMA ATUARUK Tasiilami piterarnera pissutigalugu atuarfiit paaqqinnittarfiillu matoqqassasut
Piterarnissaata tamatumalu malitsigisaanik silap allannguutaata ilimasaarutiginissaa pikkoriffiginerulerniarlugu Danmarkimi silasiorfiup DMI-p Tasiilamut silap qanoq innissaanik immikkut ilimasaaruteqartarnermut periaatsimik nutaamik sukumiilluinnartumillu suliaqarpoq.
Silap qanoq innissaanik ilimasaaruteqarnermut periaaseq Harmonie-TAS-imik taaguuteqarpoq, 750 meterit angullugit qanitsigisumut ilimasaaruteqarsinnaalluni, tamannalu nunarsuaq tamakkerlugu silap qanoq innissaanik ilimasaaruteqartarnermut periaaserineqartuni uuttuutit sukumiinerpaartaat. Assersuutitullu taaneqarsinnaavoq DMI-p Danmarkimut nunatsinnullu ullormut silamik qanoq innissaanik ilimasaaruteqartarnermut periaaserisartagai 2,5 kilometerinut atuuttarmata.
AAMMA ATUARUK Piteraq Tasiilami ajoqusiingaatsiarpoq
- Taama imminnut qanitsigisunik uuttortaaveqarluni silap qanoq innissaanik ilimasaarusiornermut periaaseqarneq, nunap ilusaanut Tasiilamitulli taama allanngorartigisumut immikkut illuinnartuuvoq pingaaruteqarlunilu, Xiaohua Yang, DMI-mi silap qanoq innissaanik ilimasaarutinut periaatsinik ilisimatusartut pisortaat oqarpoq.
- Ilimasaarusiornermut periaatsinik assingusunik Kalaallit Nunaata sineriaani illoqarfinnut arlalinnut atugassanik suliaqarnissarput qularnanngilaq, taamaaliornikkut sumiiffinnut immikkut aarlerinaateqariusunut ilimasaarutit pitsanngorsarumallugit.