Danmarkimi qinersiartortut kingullermik qinersinermut naleqqiullugit amerlanerusut
![](/sites/default/files/styles/image_934x467/public/article_images/20190605-135141-l-1920x1279we.jpg?itok=bd9JOv-O)
Qinersiartortut procentinngorlugit naatsorsorneqarnerat qinersinermut kingullermut naleqqiullugu ullup ingerlanerani tamatigut qaffasinneruvoq.
Danmarkimilu nalunaaqutaq 16.00 qinersisartut 72,7 procentii qinersiartoreerput. Ritzauip kommuninut taasivinnullu paasiniaanera qinersisartunik 478.304-nik tunngaveqartoq taama takutitsivoq.
2015-imi qinersisoqarmat piffissap taamaalinerani qinersiartortut 49,7 procentiupput.
Taamaammat Danmarkimi nalunaaqutaq marlunngortoq qinersisartut affaat qinersiartoreerput.
AAMMA ATUARUK Assiliartalersugaq: Folketingimut ilaasortat nunatsinneersut suliarisartagaat
Socialdemokraatillu siulittaasuat Mette Frederiksen mianersortumik isumalluartoq Danmarkip Radioata taasiviup silataani naapippaa.
- Qinersisartunik isumasiuinerit qanoq upperitigissanerlugit nalunara. Socialdemokraatilli ilassilluarneqarnerat malugisinnaavara, aamma socialdemokraatit ilaasa ukiualunni allanik qinersisimagaluarlutik tamatumuuna uatsinnik qinersiniarnerat malugisinnaavara. Amerlasuut uannut taama oqarpoq.
AAMMA ATUARUK Grafik: Det bestemmer Folketinget i Grønland
Aamma ministeriuneq Lars Løkke Rasmussen qinersiartorami qiimavoq, naak qinersisartunik isumasiuinerit takutikkaluaraat naalakkersuisoqatigiivi kinguariartussanngortut.
- Qinersisartunik isumasiuineq eqqartorneqarsinnaasutuaq tassaavoq qinersinerup inernerata unnugu nalunaarutigineqarnera. Ernumanngilanga, aamma Piet Hein qineqqusaarnermi matumani arlaleriaqalunga issuartarpara: "Upperisaq ilumoorfigigaanni aamma eqqissisimaneq pigineqarsinnaavoq", ministeriuneq oqarpoq.