DK-imi aalisartut tapiiffigineqarumanngillat

Danmarkimi aalisartut sapaatip akunnerata naanerani ataatsimeersuaramik pakatserujussuarput.

Ikummatissap, taamaalillunilu aamma orsussap, piffissami kingullermi akitsorujussuarnera danskit aalisartuinit aamma malugineqarsimaqaaq, naalagaaffimmilli tapiiffigineqarnissaminnik qinnuteqaraluarnerat Inuussutissaqarnermut ministerip, Hans Christian Schmidtip, aamma Europaparlamentimi ilaasortap socialdemokratiusup, Henrik Dam Kristensenip, itigartippaat.

Danmarkimi Aalisartut Kattuffianni siulittaasup, Flemming Kristensenip, politikerit najuttut ataatsimeersuarnerup ingerlanerani qinnuigigaluarpai, piffissami aggersumi orsussamut naalagaaffik tapiisarallaqqullugu, uuliami maanna marloriaatingajammik akitsorsimavoq, aalisartullu tunisinerminni akinik annertunerusumik pissarsisalernissaat qanittukkut pissagunarmat, tungaanut tapiiffineqartarnissaat qinnutigineqaraluarpoq.

Aalisariutit aningaasartuutigineqartarneri eqqarsaatigalugit, orsussaq taakku pingajorarterutaannik naleqarpoq. Pisarineqartartut akitsoriartoraluartut taamaattoq aalisartut isertitaqarpallaarneq ajorput.

- Erseqqissaatigeqqillara: Isumaqarpunga naalagaaffiup tapiisarnissaa pisariaqanngitsoq, aalisartummi qangali aallutartik ingerlanniarlissuk – aalisartuupput, aalisarniarlik, Inuussutissaqarnermut ministeri, Hans Christian Schmidt, siunnersuivoq.