Politikki

DF: Kalaallit Nunaat USA-mut qujasariaqarpoq

USA'p Kalaallit Nunaanni, ilaatigut Pituffimmi sakkutooqarfimminut akiliisinneqartalernissaanik siunnersuut Dansk Folkepartiimit assut isornartorsiorneqarpoq.

Allattoq Helle Nørrelund Sørensen

oktobarip 14-at 2016 12:02

Nutserisoq Erna Lynge

Nunanut allanut tunngasunut Folketingimi ataatsimiititaliami siulittaasup tulliata Dansk Folkepartiimmeersup Søren Espersenip siunnersuut aviisimi Berlingskemi siunnersuut akuersaarneqarsinnaanngilluinnartutut taavaa.

Taama oqarpoq nunanut allanut tunngasunut naalakkersuisup Vittus Qujaukitsup sapaatip akunnerani matumani Inatsisartuni siunnersuutigimmagu Kalaallit Nunaata Danmark peqatigalugu USA-mut isumaqatigiinniaqqinnerni tamanna qaqittariaqaraa.

Espersenili isumaqarpoq tamanna sioorasaarilluni akilersuisitsiniarnerusoq.

- Tamanna Kalaallit Nunaanni puiguinnartariaqarpaat. Atornerluiniarneruvoq sioorasaaralunilu akilersuisitsiniarnerulluni, taamaattoqarsinnaanngilaq. Kalaallit Nunaat USA'p ukiuni 75-ini illersorlugulu sernissorsimavaa, ilaatigut sorsunnerup nillertup nalaani, tamannalu Kalaallit Nunaata USA-mut qujassutigisariaqarpaa. Kalaallit Nunaat, Namminersornerullutik Oqartussat, Namminersorlutik Oqartussat kalaallillu oqartussaasui Amerikamiunit kisissaanngitsunik ikiorneqartarsimapput.

Aamma atuaruk Justus Hansen: USA Pituffimmut akiliuteqassaaq