Detektor: Kinamiut kilitsissiatut sulisinnaanerat Carla Sandsip mianersoqqussutigaa
DR-ip aallakaatittagaata Detektorip, USA-p Danmarkimi aallartitaa oqaloqatigaa, USA-llu Danmarkimi kilitsissiatut suleratarsinnaaneranik tamanna isumaqarnersoq aallartitaq aperineqarpoq.
- USA-p Danmarkimut maanna aallartitaraanga, siunissamilu qanoq pisoqarumaarnersoq oqaluttuarisinnaanngilara. Taama aperisoqarsinnaanngilaq, Carla Sands oqarpoq.
AAMMA ATUARUK Ministerieqarfiup Savalimmiuni Huawei-imut tunngatillugu danskinit itigartitsisoqarsimannginneraraa
Kinamiut attaveqaqatigiinnikkut suliffeqarfissuata Huaweip attaveqaatinik nutaanik sukkanerusunik 5G-nik Savalimmiuni ikkussuisuunnginnissaat, USA-p Danmarkimut aallartitaata sakkortuumik oqaatigereerpaa.
Aallartitaq Savalimmiuni aviisimi Sosialurinimi oqallissaarummik novembarip naajartulernerani allaaserisaqarpoq.
Europamiut amerikamiulluunniit attaveqaatinik sukkasuunik 5G-nik Savalimmiuni ikkussuisuunissaat Savalimmiormiut eqqarsaatersuutigisariaqaraluaraat, Carla Sandsip oqallissaarummini ilaatigut oqaatigaa, Huaweilu aamma tatigineqarsinnaanngitsoq DR-ip nutaarsiassaqartitsivianut aamma oqaatigalugu.
- Huaweimik tapersersuisut Huaweimik nittarsaassisartutut Huaweimit akilerneqartarput, taanna oqarpoq.
Amerikamiut nunani allani inunnik ataasiakkaanik nakkutiginnittartutut paasisaasimanerat Carla Sandsip nammineq oqaaseqarfiginngilaa, nittartakkatigullu isumannaatsuunissaq pillugu immikkut ilisimasallip John Foleyp aallartitap Sosialurinimi oqallissaarutaa iluariniarneqartutut taavaa:
- Iluarniartutut imminut saqqummiunniarsarivoq. Amerikamiut isertortumik paasiniaasartui Kinamiut isertortumik paasiniaasartuisut namminneq iliuuseqartarput, tamalli oqartussaaqataanerat USA-mi atuummat ammanerusumik taamaaliortarput, Kinami kisermaassillutik aqutsisut akerlianik pissusilersortarlutik, John Foley oqarpoq.
AAMMA ATUARUK Venstre: Huawei itigartitsissutigineqartariaqarpoq
Amerikamiut isertortumik paasiniaasartuisa NSA-meersut CIA-meersullu nunani tamalaani inunnik ataasiakkaanik nakkutiginnittarnerat, paasissutissanik isertukkanik saqqummiussisartup Edward Snowdenip, nammineq taakkunani sulisuusimasup, nutaarsiassaqarfinnut assigiinngitsunut 2013-imi saqqummiuppai.
Amerikamiut peqqarniisaarnianik nakkutiginniinnaratik, assersuutigalugu atorfilittanik aamma nakkutiginnittarnerat saqqummiunneqareerpoq.
Allaaserisaq uani atuaruk.
