Venstre: Huawei itigartitsissutigineqartariaqarpoq

Illersornissaqarfiup Isertortumik Misissueqqissaartartui naalagaaffeqatigiinni attaveqaatinut attaveqaqatigiinnernullu allanut pingaaruteqartunut atatillugu suliffeqarfiit sorliit atorneqarnissaannut itigartitsisinnaatitaasariaqarpoq.
Illersornissaqarfiup Isertortumik Misissueqqissaartartui naalagaaffeqatigiinni attaveqaatinut attaveqaqatigiinnermilu allani aalajangiisoqarnissaanut itigartitsisinnaasariaqartoq, Venstrep nunanut allanut tunngasunut oqaaseqartartua, Michael Aastrup Jensen isumaqarpoq. Assi © : Open Grid Scheduler/Flickr Creative Commons
decembarip 12-at 2019 10:17
Nutserisoq Connie Fontain

Savalimmiuni Huawei-imit 5G-mik pisiortortoqalernissaa pillugu aarleritsassimaartoqarnerata kingunerisaanik Venstre taama siunnersuuteqartoq, Jyllands-Posten allappoq.

- Illersornissaqarfiup Isertortumik Misissueqqissaartartuisa pisiortorfiit aalajangersimasut aarlerinartutut nalilerunikkit itigartitsisinnaapput, Venstrep nunanut allanut tunngasunut oqaaseqartartua, Michael Aastrup Jensen oqarpoq.

Attaveqaatinut susassaqarfinnut tunngasut Savalimmiut Kalaallit Nunaatalu danskit sunniuteqarfiginngisaannik namminneq oqartussaaffigilernikuuaat.

Ministeriunerup Mette Frederiksenip nunanullu allanut tunngasunut ministerip Jeppe Kofodip nunat naalagaaffeqatigiinniittut attaveqaatinik pisiortorfissanik killilersugaanngitsumik namminneq aalajangiisinnaasut erseqqissaatigaat.

Taamaakkaluartorli Savalimmiormiut kinamiut suliffeqarfiutaannit, Huawei-imit 5G-mut attaveqaatinik atuilernissamik isumaliuteqarnerat uitsatigineqarpoq.

Berlingskep allaaserisaa naapertorlugu kinamiut Danmarkimut aallartitaata savalimmiormiut Huawei 5G-mik pisiortorfigilinngikkunikku Kinamut killilersugaanngitsunik niueqatigiinnissamut isumaqatigiissuteqartoqarnavianngitsoq Savalimmiuni naalakkersuisut siorasaarsimavai. Kinamiulli aallartitaata Savalimmiunilu naalakkersuisut siorasaarisoqarsimannginnerarpaat.

AAMMA ATUARUK Ministerieqarfiup Savalimmiuni Huawei-imut tunngatillugu danskinit itigartitsisoqarsimannginneraraa

Illersornissaqarfiup Isertortumik Misissuisartuisa Kinami naalakkersuisut kinamiut suliffeqarfiutaannut tamanut – soorlu Huawei-imut peqqussuteqarlutik – Kinami isertortumik misissueqqissaartartunut ikiuisussaatitaalersimanerat qanittumi mianersoqqussutigaat.

Savalimmiuni nunatsinnilu attaveqaatinut tunngatillugu suliffeqarfiit Danmarkimi Center for Cybersikkerhedimit siunnersorneqarsimapput. Huawei-illu attaveqaatinik pisiortorfigineqarnissaanut arlaannaalluunniit mianersoqquneqarsimanngilaq, Jyllands-Posten allappoq.