Kalaallit Illuat Aarhusimiittoq aningaasarpassuit atorlugit nutarterusunneqarpoq
Kalaallit Illuanik nutarteriniarnerup titartarneqaleruttortup takorloorneqarnera taama ippoq.
Kalaallit Illuat Aarhusimi najukkani sumiiffinni kusanarnerpaaniippoq. Illutaali qajaqaraluartoq, silataanilu kalaallit erfalasoqarluartoq, inuppassuit illumut tikilluaqqusaanertik suli naluaat.
Illumi pisortaq Jørn Holbech taama oqarpoq.
- Ullumikkut eqqatsinni ungaloqarpugut. Illulu iserfigineqarsinnaasoq inunnik takuneqarsinnaavallaanngilaq.
Taamaammat illorsuup pisoqqap 1902-imeersup 160 kvatradmeterimik ilallugu nutarsarneqarnissaa, pisortaasa kissaatigaat.
Aamma atuaruk IKIORTARIALLIT Danmarkimi kalaallinut ajornartorsiortunut kommunit ikiuutissaat assigiinngeqisut
Illullu ilassutissaa ilaatigut tusarnaartitsinernut, oqalugiartoqarnernut, saqqummersitsinernut atorneqassaaq saniatigullu cafémik allaffinnillu amerlanerusunut sanasoqassalluni.
Katerisimaartarnissammi pisariaqartinneqariartuinnarput.
- Ukiummi qulit ingerlanerani kalaallit Aarhusimiittut Midtjyllandillu sinneraniittullu 20 procentimik amerlipput, tamannalu malitsigalugu naapiffinnik, piorsarsimassutsimullu tunngasunik atorneqarsinnaasunik pisariaqartitsisoqarpoq. Pisariaqartitallu taakku minnerpaamik ukiut qulit amigaatigineqareersuupput.
Aamma atuaruk Danmarkimi ikiorsiissutinik qummut killiliineq kalaallinut ilaqutariinnut eqquisinnaasoq
Illuli tamanut ammasuussaaq, aamma Aarhusimiunut Kalaallit Nunaata maannakkut qanoq inneranik paasisaqarusuttunut misigisaqarusuttunullu ammasuussalluni.
- Kalaallit Illuat Aarhusimut ammarusupparput, Aarhusermiullu illumut iseqqullugit. Tusatsiakkammi allanngortikkusuppagut. Kalaallimmi Nunaat nutaaliaanerusoq suullu ullumikkut periarfissaanersut oqaluttuarinissaat pingaaruteqarpoq.
Illup ilaneqarnissaanut pilersaarutip 12 millionit koruuneqarnissaa naatsorsuutigineqarpoq, Kalaallillu Illuat tassunga atatillugu aningaasaleeqataasinnaasunik ujaasivoq.
Pilersaarullu iluatsissappat, sanaartugaq 2017-imi piareerneqassasoq neriuutaavoq, taamanikkussarmi Aarhus Europami kulturikkut takutitsinermi aaqqissuisuusussaavoq.