Minneapolisimi akerliussutsimik takutitsisut politeeqarfik ikuallatsikkaat

Minneapolisimi angutip taartumik amillip toqunerata kingorna eqqissiviilliortoqartuarsinnarpoq. Sakkutuut 500-t eqqissiviilliornernik nakkutiginnittussatut sulisinneqarput.
- Tusarliussani uppernarsarneqanngitsuni oqaluttuarineqarpoq politeeqarfimmut gassimik pilersuinermik ruujori kipineqarsimasoq qaartinneqarsinaasunillu politeeqarfimmiittoqartoq, Minneapolisimi oqartussat taama allapput. Assi © : Carlos Barria/Reuters/Ritzau Scanpix
Allattoq Ritzau
maajip 29-at 2020 09:12
Nutserisoq Ivik Kristiansen, Jaaku Lyberth

USA-mi illoqarfimmi Minneapolisimi politiit angummut taartumik amilimmut nakuusernerata malitsigisaanik illoqarfimmi ullut pingajussaanik eqqissiviilliortoqarpoq. USA-mi nutaarsiassaqartitsivik NBC News taama allappoq.

Illoqarfimmi politeeqarfik sisamanngormat unnukkut ikuallappoq, Minnesotallu guvenøriata Tim Waltzip sakkutuut Nationalgardenimeersut 500-t sulisippai illoqarfimmi eqqissiviilliornerit nakkutigineqarniassammata.

AAMMA ATUARUK Angut taartumik amilik toqummat akerliussutsimik takutitsisoqartoq

Nutaarsiassaqaritisiviup NBC News-ip tusarliussai naapertorlugit politiit oqaluttuarsimapput sisamanngornermi unnukkut annertuumik ajoqusertoqarsimanngitsoq.

Minneapolisimi oqartussat innuttaasunut qarasaasiakkut attaveqatigiittarfik Twitterikkut kaammattuuteqarput politeeqarfimmit qimaguteqqullugit.

- Tusarliussani uppernarsarneqanngitsuni oqaluttuarineqarpoq politeeqarfimmut gassimik pilersuinermik ruujori kipineqarsimasoq qaartinneqarsinaasunillu politeeqarfimmiittoqartoq. Politeeqarfiup eqqaaniikkuit qanillattornaveersaaruk politeeqarfik qaartuussagaluarpat isumannaatsuunissat pinerullugu, Minneapolisimi oqartussat taama allapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq