Angut taartumik amilik toqummat akerliussutsimik takutitsisoqartoq
USA-mi naalagaaffimmi Minnesotami illoqarfimmi Minneapolisimi akerliussutsimik takutitsisut politiillu akornanni pingasunngornermi aporaatilerput.
Angutip taartumik amillip sakkulisanngitsullu politiinit tigusarineqarnermi kingorna toqunera pissutaalluni akerliussutsimik marlunngormalli takutitsisoqalerpoq.
Politiit akerliussutsiminnillu takutitsisut akornanni aqqusinerni aporaattoqartoq, nutaarsiassaqartitsivik AP ilisimatitsivoq. Pisiniarfiit amerlasuut illoqarfimmi tassani aporaattoqarnerani aserorteriffigineqarlutillu tillinniarfigineqarput.
Inuk ataaseq aporaattoqarnerani aallaaneqarluni toqutaasoq politiit tusagassiortunik katersortitsinermi nalunaarutigigaat, Minneapolisimi aviisi Star Tribune allappoq.
Angut tigusarineqartoq qimisaanngusimasoq
46-nik ukiulik taartumillu amilik George Floyd, politiinit tigusarineqarnermi kingorna napparsimmavimmi toquvoq. Taanna politiinit tigusarineqarami politiip aqqusinermut uppiteriarlugu seeqquminik qungasiatigut nanerpaa.
Angut tigusarineqartoq tigusaanermini qasseerpassuariarluni qimisaanngunerarsimavoq.
Politeeq taamaaliortoq politiillu allat pingasut tigusarinneqataasut marlunngormat soraarsitaapput.