Hongkongimi politiit akerliussutsimillu takutitsisut aqqusinermi akersuuttut
Hongkongimi aqqusinerni akerliussutsimik takutitsineq sakkortuseqqippoq.
Hongkongimi politikikkut siuttumut, Carrie Lamimut akerlisuut tusindilikkaat illoqarfimmi katersuussimapput, politikikkummi siuttuusup nunami aqutsinera akerliuffigineqarpoq.
Sakkortuumillu akerlisoqarpoq - illoqarfiup qeqqani illorsuit ilaasa igalaavi aserortinneqarsimapput, akerliusullu iserniaralutik.
Politiillu illorsuarmiittut piareersimatinneqarput - allagartarsuarmimi allaqqavoq: akerliunersi unitsinngikkussiuk pissaaneq atorlugu akissaagut.
Hongkongimimi juulip ulluisa aallaqqaataanni nunasiaataajunnaarnerup ullorigaluarpaa.
Hongkongimi Tuluit Nunaannit ukiuni 150-ini nunasiaataasinnarluni 1997-imi nunasiaataajunnaarpoq, ullorlu pingaartorsiorfiusaraluarpoq aamma ullormi Kinamut illersuisut akerliusullu akerliussutsimik takutitsivigisaraluarpaat - politeerpassuilli ullumikkut piareersimatinneqarput.
Reutersilu naapertorlugu akerliusut ullaassarli aallartipput. Akerliussutsimilli takutitsisut juunip ulluisa qulingiluaannili aallartipput, inatsimmi naapertorlugu inuit Kinami eqqartuussivitsigoortumik malersugaasinnaanissaat pillugu akerliusoqarpoq, inatsillu taamaatiinnarneqareeraluartoq suli akerliusoqarpoq.