Demokraatit Siumut naalakkersuisoqatigerusunngilaat
Jens B. Frederiksen qinersineq sioqqullugu oqarpoq, Siumukkut pissaanermik tigusissagaluarpata, Kattusseqatigiit naalakkersuisoqataalerusunngitsut. Isummanilu suli aalajangiusimavaa.
Demokraatit siulittaasuat pakatsisimaaqisoq Radioaviisimit ullumi oqaloqatigaarput, taannalu oqarpoq, soorunami tulluusimaarnarpallaanngitsoq, qinersisartulli oqariartuutaat allatut ajornartumik ataqqisariaqaritik.
Demokraatit 2009-mi qinersinermi Inatsisartuni sisamanik ilaasortaatitaqalerput. Taakkuli affaannanngortut unnuaq paasinarsivoq.
Siumumik naalakkersuisoqateqalernissaq Jens B. Frederiksenip qangali oqaatigisareerpaa, Inuit Ataqatigiillu pissaanermik maanna tigummisaqarunnaarmata, Demokraatit maanna illuatungiliuttunngussapput. Tamanna ajornartorsiutaanngitsoq, siulittaasoq oqarpoq, siornatigut misilereeritsik, aamma taama suleqqissallutik, taavalu soorunami periarfissaqaraangamik suleqataasarumaarlutik, kisiannili akerleriikkaangamik akerleriittassallutik.
Uran pillugu qanorluunniit eqqarsaateqaraluaraanni, Demokraatit Siumumut partiitut tapersersuisuulernissaat Jens B. Frederiksenip aamma takusinnaanngilaa:
- Oqareerpunga, isumaqarutta pitsaasuussasoq soorunami tapersersuiumaarpugut, kisianni aamma akerliujumaarpugut uagut politikkitsinnut tulluarpallaanngikkaangat.