Demokraatit siulersuisuini allanngortoqarpoq
Demokraatit siulersuisuisa ilaat allanik taarserput siulittaasualli ingerlaqqilluni.
Anna Wangenheim Demokraatini politikkikkut siulittaasup tullinngorpoq, Nivi Olsenilu aaqqissuussaanikkut siulittaasup tulliatut ingerlaqqilluni.
Demokraatit arfininngornermi maajip 14-anni ataatsimeersuarmata siulittaasuat Jens-Frederik Nielsen siulittaasutut ingerlaqqippoq, peqqissutsimullu naalakkersuisuusimasup Anna Wangenheimip Steen Lynge taarserlugu politikkikkut siulittaasumut tullinngorpoq.
Jens-Frederik Nielsenip siulittaasunngoqqinnini iluarisimaarpaa:
-Nuannaarutigisannik siulittaasutut ingerlaqqinnissara tamakkiisumik tapersersorneqarlunga toqqarneqarpunga. Taannalu assorujuk tuppallernarpoq, ingerlaqqinnissannullu nukissamik annertuumik tunisilluni.
Ukiuni tulliuttuni 2024-p tungaanut immikkut ittumik pisoqanngippat Jens-Frederik Nielsenip siulittaasuuginnarnissani naatsorsuutigaa.
AAMMA ATUARUK Demokraatit naalakkersuisoqataajunnaartut
Aaqqissuusseqqittoqarnissaa sulissutiginiumavaat
Demokraatit maanna naalakkersuisooqatigiinnut Inuit Ataqatigiinnut Siumukkunnullu illuatungiliuttuusut siuliani naalakkersuisooqatigiissimasuni Kim Kielsenimit siuttuuffigineqartuni naalakkersuisooqataasimapput, taamanili naalakkersuisoqatigiinnermit anipput Kuannersuarni aatsitassarsiornissaq Siumukkut iluanni akerleriissutaammat.
Demokraatit ukiuni tulliuttuni marlunni illuatungiliuttuuneq naalakkersuisooqataanerluunniit apeqqutaatippallaarnagu sunniuteqaqataaffeqarumasut Jens-Frederik Nielsen oqarpoq:
- Akileraartarnermut aaqqissuusseqqinnissaq takkukkiartuaarpoq, tassani Demokraatini ersarittorujummik politikkeqarlutalu oqariartortaqattaarpugut, taakkualu malersussavagut. Taava saniatigut aalisarnerup iluani aaqqissuusseqqinnissamik taaneqarsinnaasumik pilersitsisoqartussaavoq, tassanilu ersarittunik naleqartitaqarpugut, soorunami taakkua sunniiffiginiarsarissavagut.
Demokraatit ilinniartitaanermi sulisoqarnermilu aaqqissuusseqqinnissanut sunniuteqaqataajumapputtaaq. Jens-Frederik Nielsen:
- Ilinniartitaanerup iluani aaqqissuusseqqinnissaq atorfissaqartinneqangaaqisumut taavalu sulisoqarnerup iluani aaqqissuusseqqinnissamut tikkuussinissaq Demokraatininngaanniit naatsorsuutigineqassooq.
