Demokraatit qinersinermi ajugaapput

Demokraatit Inatsisartut qinersinermi ajugaapput.

Nunatsinni qinersiviit annerpaanni, Nuummi taasisut kisinneqarsimalerput, Aasiaat, Maniitsorlu suli amigaataapput, kisianni Demokraatit partiinit allanit nikingassutaat annertungaatsiarpoq, taamaammat Demokraatit nunatsinni partiini anginerpaanngortoq qularnanngilaq.

KNR-ip aaqqissuisoq, Jens Thorin nunatsinni politikikkut ukiorpassuarni malinnaasoq oqarpoq.

Taasisut 99 procentii maannamut kisinneqarsimalerput. Demokraatit siulittaasuat, Jens Frederik Nielsen 4.419-init taaguunneqarpoq, qinersinermilu matumani taaguunneqarnerpaalluni.

Naatsorsuutigisimanngikkaluaraa

- Soorunami tupaallannartuuvoq uatsinnut, isumalluarnikuuvugut aamma misigisivunga oqariartuutigut inuiaqatigiinnut apuunnikuullugit, kisianni naatsorsuutigisimanngikkaluarparput qinersineq taamatut allannguitigissasoq, Jens-Frederik NIelsen partiit siulittaasuisa KNR TV-mi oqallinnermi oqarpoq.

- Nunatta piffissami avataanit soqutiginniffiusumi ataatsimoornissarput pisariaqartippaa. Ataatsimoornissaq pisariaqartinneqarpoq, taamaammat kikkut tamarmik isumaqatigiinniarfigissavagut, taanna oqarpoq.

Demokraatimmi partiini annerpaatut naalakkersuisunik nutaanik pilersitsinissamut isumaqatigiinniarsinnaatitaavoq.

Taassumalu qinersinermi taaguunneqarnerpaat aappaat - tassa Naleraq isumaqatiginiarfiginissaa aamma piareersimaffigaa.

- Naleraq kusanartorujussuarmik aamma siuariartorpoq, nunatsinni maannakkut takusinnaasatsitut partiini anginerpaat maanna tulliuvoq. Taamaammat soorunami avaqqunneqarsinnaanngillat, kisianni aamma soorunami isumaqarpunga oqaatigisariaqarlugu partiit sinneri taakku sumilluunniit matuunneqanngillat. Ataatsimoorfissamik nunarput pisariaqartitsivoq soorunami, taanna oqarpoq.

Naleraq qinigaalluartoq

Demokraatit maanna - nalunaaqutaq 01.04 - Inatsisartunut ullumi qinersisunit 30,5 procentinit ikinnerunngitsunit taaguunneqarsimarpasippoq. Partii taamaalilluni partiinit nalinginnaasumik annerpaasartunit Inuit Ataqatigiinnit Siumumiillu taaguunneqarnerulluni.

Naalli qinersiviit ilaannit inernerit suli amigaataagaluartut taakku naalakkersuisooqatigiikkunnaarpasipput: IA qinersinermi 21 procentinit taaguunneqarpasipput, Siumullu 15 procentiinnarnit taaguunneqarpasilluni.

Naleraq aamma taaguunneqangaatsiarpoq - partii maanna nunatsinni partiini anginerpaat tulliattut inissittussaarpasippoq. Demokraatit Nalerarlu qinigaaffimmi kingullermi tamarmik illuatungiliuttuniipput.

Siumup siulittaasuata partiit siulittaasuisa oqallinnerannut orniguttup qineqqusaarneq narlortumik ingerlassimanagu ajorsarnera ersarippoq. Tassami namminiilivinnissap qanoq sukkatigisumik pinissaanik oqallinnermi allamut saaqattarnermik qinigaalluartartullu Siumumit Naleqqamut nuunnikuupput.

- Oqaluttuarisaanermi partii Siumut aatsaat taama angusarlutsigisoq nalaapparput. Taamaattumik akisussaaffik tamakkiisoq uanga paarivara, taanna oqarpoq.

- Qinigaanerlunnermi akisussaaffik tamaat tiguara.

Siulittaasutut tunuarnissannik eqqarsaateqarpit?

- Sinngutigeqqaalaartigu, taamaattumillu susoqarumaarnersoq takujumaarparput ulluni qaninnerpaani, Erik Jensen akivoq.

Ajugaarujussuartoq

Demokraatini Jens-Frederik Nielsen 33-nik ukiulik siulittaasuuvoq. Qinersinermilu ajugaanerat ajugaarujussuarneruvoq, tassami 2021-mi qinersisoqarmat partii 2454-init tassa qinersisut 9,1 procentinit taamaallaat taaguunneqarpoq. Demokraatit ullumikkut 8.200-init taaguunneqarpoq.

Qinersinerup unnua aallarteqqammiinnartoq partii qinersinermi matumani angusarissaarnerungaatsiartoq ersarereerpoq.

Qinersinerup iserneri pisortatigoortumik suli akuerineqanngillat.