Erik Jensen: Aki-Matilda Høegh-Damip Siumut iperterpaa
Siumumi piffissami kingullermi pisoqangaatsiarpoq. Folketingimut ilaasortap, Aki-Matilda Høegh-Damip Siumumi naalagaaffinngornissaq pillugu suliaqarneq arriippallaarnerarlugu Naleqqamut ataasinngormat ilaasortanngorpoq.
Taassuma Siumup innera qamissimanerarlugu Siumumut suli ilaasortaalluni aamma isornartorsiorpaa.
Taamaattumik Aki-Matilda Høegh-Damip parteerisimasani, Siumut, ipertersimagaa, Siumup siulittaasua, Erik Jensen isumaqarpoq.
- Taamatut isumaqarnarpoq. Aamma isumaqarpunga nikassaalluni, nakkarsaalluni, qamissimanerarlugulu ikumannginnerarlugu oqariartorneq imaannaangitsuusoq akuersaarneqarsinnaanngitsorlu.
- Taamaattumik ilungersunartorujussuuvoq taamatut ipertereriarluni allamut partiimut nuunnera, taanna oqarpoq.
Siumumit Siumuunerusoq
Aki-Matilda Høegh-Damip Naleqqamut ilaasortanngornerminut atatillugu KNR-imit ataasinngornermi apersorneqarluni ilaatigut ima oqarpoq:
Uanga isiginnittariaasera malillugu Siumuvik ornippara.
Naleqqap Siumumit Siumuunerulersimaneranik oqarneq Siumup siulittaasuata, Erik Jensenip mamiatsaatigaa.
- Ilungersunartorujussuuvoq taamatut isumaqalersimaguni. Siumukkormiut, uagut, Siumumiittugut, Siumuunnginnerarluta oqariartorfigivaatigut. Sinerissami Siumukkormiorpassuit taamatut aamma oqarfigivai.
Erik Jensenip Aki-Matilda Høegh-Damip pissusilersuutai inuup ataatsip partiimit angineruniarsarineratut nalilerpai.
- Inuit ataasiakkaat imminnut namminneq sapiitsutut qunusuitsutullu nittarsaanniaqattaarlutik partiiminngaanniit anginerulertutut pissusilersorniaqattaarnerat isumaqatiginngilara.
Siulittaasunngorniartoq
Aki-Matilda Høegh-Damip oqaatigisai Siumup siulittaasuata tupaallaatiginngilai.
Siumut Qasigiannguani 2023-mi nuna tamakkerlugu ataatsimeersuarmat Aki-Matilda Høegh-Dam siulittaasussatut sassarpoq, Erik Jensenimulli ajorsarluni.
Maannalu pisoq taamanimiilli ilimanarsiartuinnavittoq, Erik Jensen oqarpoq.
- Soorunami ilaasortanik annaasaqarneq uggornartuusarpoq. Aalajangernera tusaatissatut tiguarput. Naatsorsuutigereersinnaasimavarput piffissami sivitsortumi tassunga ingerlajartuaartoqartoq. Ataatsimeersuareernerup kingunerisaanik tassunga ingerlajartuaartoqartoq ilutsinni takusinnaasimavarput.
Aki-Matilda Høegh-Damip Folketingimi sulinini Naleraq tunuliaqutaralugu nangissavaa. Taannalu Inatsisartunut marsip aqqarnanni qinersinissamut sassarpoq.
