Demokraatit Qaasuitsumi sukataalersut

Partiip pingaarnertut sassartitaa tassaavoq ilinniartitsisoq timersoqatigiiffimmilu Nagdlunguami siulittaasoq Lena Ravn Davidsen. Taassuma partiit allat kommunimut apriilip sisamaani qinersinissamut unammillertussaassavai.

Iluliarmiullu Lena Ravn Davidsenip qineqqusaarutaani sallersaasoq tassaavoq atuartitsineq pitsaanerusoq, ilaqutariinnut klassit iluaqutigalugit kiisalu ilinniartitsisut angalasartut. Partiip tusagassiorfinnut nalunaarutaani taama oqarpoq:

- Meeqqat atuarfiat ineriartortinneqassaaq ilaqutariinnut klassi pillugu aaqqissuussineq kiisalu ilinniartitsisut angalasartut atorlugit, Lena Ravn Davidsen taama siunnersuuteqarpoq.

Aamma illoqarfiit atuarfiini inunnik isumaginninnermi siunnersortinik amerlanerusunik atorfinitsitsisoqartariaqarsoraa, taakkulu kommunimi isumaginninnikkut suliassarpassuarnut tunngatillugu oqilisaassissapput.

Lena Ravn Davidsen isumaqarpoq siunnersuutigisani kommunimit Naalakkersuisut peqatigalugit aningassalersorneqarsinnaassasut.

Kommunimi politikki Lena Ravn Davidsenimut nutaajuallaanngilaq. Arnaami Ester Ravn Jensen Qeqertarsuup Kommunererisaani kommunalbestyrelsimi arnani siullersaalluni ilaasortaasimavoq. Kingorna aamma angaava Jens-Johan Broberg kommunimi tassani ukiuni arlalinni borgmesteriuvoq.

Demokraatit qinersinermi kingullermi 6,4 procentinit qinerneqarput.